وين بتلاقوا كباية شاي ببيروت مع قعدة رايقة؟

مين عبالو كباية شاي بهل طقس؟ لأنو صرنا على بواب الخريف، ما بيكمل الجو من دون صبحية أو عصرونية شاي، فكيف إذا كانت ببيروت؟ لقينالكن 7 مطارح لتجربوا شاي ببيروت مع قعدة رايقة.

1. حشيشة قلبي، الجميزة

مطرح مهضوم متخصص بالشاي بالجميزة، دغري بيفوت على القلب وفايحة منو ريحة الأعشاب والخلطات الطبيعية. عندن أكتر من 30 نوع شاي، وقعدة لزيزة ورايقة.

الرقم: 777 738 03

2. بيت كنز، سرسق

بيت بيروتي ساحر الجمال بيستقلبكن على الأجواء التراثية، القعدة المفرفحة، وكباية شاي أو زهورات سخنة بتروق الأعصاب.

الرقم: 098 777 81

3. كافيه يونس، فروع كافة

مش بس بتلاقوا عند كافيه يونس قهوة غير شكل، بس كمان شاي ومخبوزات طيبة من الصبح بكير.

الرقم: 654 741 01

4. Kalei Coffee، راس بيروت ومار ميخايل

اللي عبالو قعدة رواق تحت الشجر ببيروت، لازم يجرب هالكافيه المهضوم، عندو كباية شاي مميزة بهل قعدة.

الرقم: 342 780 03

5. بيت كافيه، مار ميخايل

عصرونية مع فنجان شاي بيروق الراس ناطركن عند بيت كافيه، بيت بيروتي قديم بمار ميخايل وعندو قعدة جنينة بتاخد العقل.

الرقم: 390 761 71

6. The Backburner، صيفي فيلدج

مطرح غير شكل لتروقوا راسكن على كباية شاي سخنة وحلويات طيبة، وبعد ما تخلصوا تتمشوا بشوارع صيفي الحلوة.

الرقم: 343 989 01

7. كانتينا سوسال، الأشرفية

اللي عبالو مطرح رايق للشغل أو الدرس مع فنجان شاي وأكل صحي، كانتينا عندو أروق قعدة بالأشرفية.

الرقم: 714 324 01

شوفوا كمان، ٦ مطارح ببيروت بتحسسّكن إنكن بالطبيعة