شوفوا معنا شو كانو يعملوا جدودنا بشهر أيلول

شهر أيلول هوي شهر خاص بالنسبة لكتار، خصوصي بس نتذكر التقاليد العزيزة على قلبنا لي كانوا جدودنا يعملوها. بالزمن لي عم نعيشوا صارت هل تقاليد كنز منحب نحافظ علي، لهيك حبينا اليوم نضوي على بعض الأمور لي جدودنا معودين يعملوها بشهر أيلول لنحتفظ بتراثن العظيم.

١. تحضير المونة

أبرز التقاليد لي بتصير بهل شهر من كل سنة، تحضير”المونة” السنوية. المونة يعني حفظ الفواكي والخضرا الموسمية لفصل الشتا. كانو جدودنا يقضوا ساعات بالمطبخ عم بحضروا “مربى التفاح” و”رب البندورة” و”الكشك” و”الكبيس” و”المكدوس”. هل “مونة” بتخلي سكان البيت يستمتعوا بنكهات الصيف خلال الأشهر الباردة.

٢. تحويش الزيتون وتحضير زيت الزيتون

شهر أيلول هوي بداية موسم حواش الزيتون بالعديد من المناطق اللبنانية. بهل شهر بتجتمع العيلة كلا لتجمع الزيتون من الشجر، بنقوهن منيح وبيرجعوا بودوهن على معصرة الزيتون بالضيعة مطرح ما بينعصروا بطريقة باردة لإنتاج أفضل أنواع زيت الزيتون. بهل شهر بتنتلي الشوارع ريحة زيت الزيتون الطازة، وهل ريحة بتضل حاضرة بذكرياتنا.

٣. تحويش العنب

شهر أيلول يعتبر الوقت الأنسب لتحوش العنب. كانو جدودنا بيعرفوا إنو جودة النبيد والزبيب بتعتمد على نضوج العنب،لهيك كانوا يحوشوا بوقتو وينشفوا تحت الشمسات أو يعصروا ليعملوا منو عصير عنب طازة أو شراب النبيد أو خل وعصير الحصرم ودبس الحصرم.

٤. ضب الكشك والبرغل

“الكشك” والـ”برغل” هني شغلتين مهمين بالمطبخ اللبناني التقليدي، وكانوا جدودنا معودين يحضروهن قبل بوقت. كانوا يعملوا “الكشك” من اللبن والقمح والملح، وكان “البرغل” كمان إلو حصة بكل بيت. وهل شي كان هدفوا إنو ما حدا ينقطع من حواضر البيت بالشتوية.

٥. قطف الأعشاب

كانوا جدودنا يتمشوا بالطبيعة ويجمعوا أعشاب برية وفطر ليضيفوا نكهات طبيعية على الأكل وكانوا يحوشوا كمان زهورات ويخبوها للشتوية لإذا حدا صخن أو مرض.

٦. تحويش التين

بهل شهر كانوا جدودنا يركضوا ليقطفوا تين وياكلوا منو على الصبحية ويضيفوا منو ويعملوا منو مربى.

٧. الزعتر والسماق

كمان بهيدا الشهر كانو جدودنا يركضوا يحوشوا زعتر بلدي من البرية، ينشفوا منيح ويشمسوا ويطحنوا ليرجعوا يحطوا بالمناقيش والعرايس بالشتوية. وكمان كانوا يحوشوا سماق من الشجر، يفرطوا وينشفوا ويطحنوا للطبخات.

شهر أيلول عندو مكانة خاصة بقلوبنا، وبذكرنا بعادات التيتا والجدو بهل فترة!

شوفوا كمان، ١٩ متل لبناني عن شهر أيلول.