١٩ متل لبناني عن شهر أيلول

سبحان الله بس يجي شهر أيلول، بصير في تغييرات بالطقس. شهر أيلول عنا بلبنان هوي وقت النقلة من فصل الصيف لفصل الخريف، وهالتغيير بيتجسد بمجموعة من الأمتال والعبارات الشعبية. هالعبارات بتعبر عن التراث الثقافي والزراعي الغني عنا، وكيف هالشهر مميز بتقاليدو وعاداتو وحب اللبنانيي إلو.

خلونا نشوف ١٩ متل لبناني عن شهر أيلول بيعكسوا تفاصيل وعادات جدودنا. هالوقت من تجهيز الموسم الزراعي واستقبال فصل الخريف وايامو الباردة، بهب الحنين لأيام الشتوية عند كل حدا فينا.

١. أيلول دنبو مبلول: لما يجي هالشهر بتبلش الدني بالشتي الخفيف

٢. بأيلول تموّن لعيالك وخلي الهم على بالك: هيدي العبارة بتحكي إنو لازم تشتري أكل وضروريات الشتوية وتخليهن عندك

٣. يلي ما تموّن بأيلول بيعيش عيشة بهلول: إذا منك جاهز للشتوية، رح تعيش فترة صعبة

٤. بأيلول طار النحل والنحول: هل متل بيحكي عن نشاط النحل بجمع الرحيق والعسل خلال شهر أيلول لي بيبلشوا يتحضروا في لفصل الشتا

٥. بأيلول بيطيح الزيت بالزيتون والمر بالليمون: بهل وقت، بببلش قطف الزيتون وصناعة الزيت، وببلش موسم الليمون كمان

٦. بأيلول مدو الجلول: بالشهر هيدا بتبلش الناس تمد الفرش الشتوي بالبيت

٧. بآخر أيلول الصيف بيزول: لما نوصل ل 23 أيلول بتخلص الصيفية

٨. إذا ما شتت بعيدنا بنقطع إيدنا: إذا ما شتت ع عيد الصليب عند المسيحيي بتضرر المزروعات وبينقطع الرزق

٩. بعيد الصليب كل أخضر بيشيب: بعد عيد الصليب ببلش الخريف والشجر بصير يابس وبيكبر وبشيب

١٠. بأيلول دبر المكيول للحمص والعدس والفول: بهل شهر ببلش التحضير للأكلات الشتوية متل الحمص والعدس والفول

١١. بأيلول يا ويلو يلي ما عندو بيت معمول: هيدي العبارة بتحكي إنو لازم تكون مستعد للشتا ويكون عندك مأوى دافي

١٢. زهر أيلول لمعوجات القرون: بهل شهر بتبلش زراعة محاصيل جديدة وتخزين النباتات للموسم الشتوي والبعض بفسرو إنو الحيوانات بتاكل كل شي باقي من زهر الصيف بأيلول

١٣. آب وأيلول شهر الخرس: شهر آب وأيلول عادةً بيقطعوا على رواق بلا عجقة وضجة

١٤. أيلول المعاصر: أيلول شهر تشغيل معاصر الزيتون

١٥. أيلول بآخره بيبين كل مجهول: في أمور كتيرة مفاجآة بتصير بهل شهر

١٦. بأيلول بتطلع المي من التلول: بتبلش المي تطلع بالأنهر والينابيع بعد فترة الصيف المشوبة

١٧. أيلول دباغ الزيتون: بهل وقت من السنة ببلش تحويش الزيتون وصناعة زيت الزيتون

١٨. أيلول طرفو من الشتي مبلول: بهل الشهر ببتبلش تشتي الدني على الخفيف

١٩. بأيلول تمشوا وما ترتاحوا: اللبنانيي بيبلشوا يتحضروا للشتوية وبيصيروا مشغولين

هالأمتال والعبارات مش بس بتعكس تقاليد وثقافة لبنان، بل كمان بتعبر عن علاقتنا الوثيقة بالطبيعة والزراعة اللي بشكلوا جزء مهم من حياتنا اليومية. وهيك منكون عرفناكن على هل أمتال لي فيها مزيج بين الشغل المتعب وحب التمتع بجمال الطبيعة والأكل التقليدي.

شوفوا كمان، أجمل ذكريات الطفولة اللبنانية.