جنينة الخواجة: لقمة لبنانية وقعدة مع الغيم بفقرا

بتحبوا القعدات الحلوة واللقمة الجبلية؟ اليوم عازمينكن على غدا لبناني غير شكل بمنطقة فقرا! مشوا معنا على جنينة الخواجة، مطعم تراثي بقعدة مع الغيوم ولقمة لبنانية طيبة.

مطعم جنينة الخواجة بيتميز بقعدة فوق الغيم بفقرا ومحاوطة بالجبال من كل الميلات، مكان مغمور بالشجر العالي وورد الجبل. مطعم غير شكل لغدا مع العيلة تحت فيّ الشجرة، وقدامكن جبال فقرا العالية والوديان الخيالية بالمنطقة. مكان ساحر لتتفرجوا على غروب الشمس وتضيعوا بالألوان الدافية مع منظر الغيوم.

مطعم جنينة الخواجة مميز لعزيمة مع أصحابكن أو ضهرة مع العيلة أو غدا رومانسي مع الشريك. مطعم بالهوا الطلق وعندو قعدة تراس من الأحلام. عندو جو تراثي أصيل، من النقشات القديمة، القعدة على صوت نافورة الميّ، والتفاصيل اللي بترجعكن على الزمن الجميل. لتقضوا نهار روعة عم تبرموا بفقرا وبتجربوا لقمة أصيلة من عندن، مشوار كامل مكمّل!

بتدوقوا اللحمة النية من كبة وفراكة وكفتة وسودة، وكمان مازة سخنة على أنواعها. ناطرتكن سفرة مليانة وكريمة بكل الأطباق اللبنانية والأكلات الجبلية اللي ممكن تخطر عبالكن. بتجربوا لقمة مشاوي من لحم غنم وطاووق، عرايس كفتة،جاط التبولة معرّم لفوق، حمص ومتبل وكل شي معمول على أصوله. بيقدموا العرق البلدي المعمول بفقرا، وكمان بتلاقوا عرق من مختلف المناطق اللبنانية.

للمزيد من المعلومات أو الحجز، اتصلوا على 568 444 76

شوفوا كمان، ٥ محلات فوق الغيوم بلبنان