٧ محلات عندن صبحية بيتوتية بلبنان

“صبح الصباح فتح يا عليم والجيب ما فيهش ولا مليم بس المزاج رايق وسليم”، يلا بنا على محلات فيكن تعملوا فيها صبحية متل صبحية البيت.

١. الحلاب، كل الفروعة

تفضلوا على ترويقة القصر عند الحلاب… فنجان شاي أكرك عجم، لحم بعجين على الطريقة الطرابلسية ورشة حامض ودبس الرمان مع صحن خضرا متل أكلات التيتا بالضيعة. قدي عبالكن هيك شي هلق؟

الرقم: 1881

٢. فرن الصبايا، عمشيت

هل محل عندو قعدة كتير مكنكنة ومهضومة بتحسسكن إنكن بالبيت من ورا الإهتمام والدلال والغنج تبع الصبايا. بحضرولكن أطيب مناقيش من عجينة ومقادير بيتوتية وفيكن تطلبوا عجينة صحية كمان وكل شي محضر قدامكن. جيبوا معكن جريدة اليوم وطلبوا فنجان قهوة وسردوها عرواق!

الرقم: 880 112 03

٣. سارة وكريم، طرابلس

كل شي بيخبزوا سارة وكريم بشهي وخالي من المواد الحافظة وأطيب شي الكيكات على شوكولا. بلشوا نهاركن بدردشة زغيرة عفنجان قهوة معرم مع قطعة كيك بالشوكولا، عم تتخايلوا الشعور؟ المحل عندو ديكور وردي بيشبه بيوت الجبل لي تأثرت بالحضارة الغجرية.

الرقم: 711 505 76

٤. كافي عيروت، إهدن

قعدة زغيرة وطيوبة بساحة الميدان بإهدن، يعني بتلتقوا بلي رايح ولي جايي متل إيام زمان. مشهور بفنجان السحلب السخن لي بيعملوا مع شوية كعك وبسكويت وكورن فلاكس. عندن كمان بوظة شغل إيد وأطايب كتيرة لتخلي قعدتكن قريبة على القلب والروح.

الرقم: 884 383 03

٥. قهوة زهير حنقير، صيدا

محل زغير قاعد بقلبو جدو مهضوم وطيب بحضر وصفة السحلب التقليدية وطبق الرز بحليب والكاستر وكل الحلويات البيتوتية لي كانت تعملن الماما بس كنا زغار. فإذا زهقتوا من القهوة والترويقة العادية وعبالكن ترجعوا إيام الطفولة رح تحبوا أكل هل محل وعمو هل محل وقعدة هل محل عالصبحية.

الرقم: 884 847 70

٦. قهوة بان Bun Coffee Shop، الحازمية

عيشوا لحظات حلوة على التراس إنتو وعم تتحنزقوا وتبلوا ريقكن بفنجان قهوة عالريق. بحضروا كل أنواع القهوة الطيبة والشهية بس لتخلوا تجربتكن بيتوتية على الآخر، جربوا القهوة التركية المغلية بركوة نحاس ومزمزوا بفنجان الشفة.

الرقم: 864 270 70

٧. سكر نبات، عمشيت

يا الله على هل محل شو حلو وشو مهضوم بيشبه قوة القزاز إيام الستينات. القعدة عندو كتير مريحة وبتفتح النفس على الأكل وأحلى شعور القعدة بوج البحر. عندن كوكتيلات بيتوتية وقهوة وحلويات وبوظة لتحلوا ضرسكن عبكرا. الناس بيقصدوا الصبح ليلعبوا ورق أو دق طاولة أو حتى ليقروا بكتابن المفضل عرواق.

الرقم: 679 624 09

“يلا بنا على باب الله يا صنايعية يجعل صباحك، صباح الخير يا اسطى عطية.” صبحيتكن حلوة يا حلوين!

شوفوا كمان، ٥ محلات فوق الغيوم بلبنان.