أجمل ٣ بيوت ضيافة بالجبل بلبنان

الحلم لي لإلنا رح يصير حقيقة من اللحظة لي رح تتعرفوا فيها على هل بيوت المخباية بالجبل لبنان.

١. ايتوس كريب Ito’s Crib، تنورين التحتا

الشمال جزء ساحر وهادي من بلدنا. كيف فيكن تتمتعوا بهالنعمة للآخر؟ أكيد بس تقرروا تكبوا كل شي وراكن وتطلعوا على بيت Ito’s Crib لتعيشوا يومين حلوين بعاد عن الضجة وعن العالم كلو. بيت ايتوس كريب Ito’s Crib قطعة من الجنة على الأرض ناطرة مين يكتشفها. لح تشعروا بهل بيت وكأنكن بالسما بسبب جمال طبيعة تنورين المحيطة والهدوء والأجواء لي رح تخليكن ترتاحوا على الآخر وتطفوا تلفوناتكن لتستمتعوا بكل لحظة وبكل ثانية.

هل محل أكتر من مجرد بيت ضيافة مع كل شي بوفرو من نشاطات نهارية وليلية متل السباحة بالبيسين، المرجوحة المعلقة فوق المي، ومشاهدة النجوم والمشي لمسافات طويلة بالغابة المجاورة لتوصلوا على نهر الجوز تبلوا ريقن بالمي المتلجة وتغطسوا إجريكن. بقلب هل قطة من السما، بيسين طبيعي قاعد بين الصخر رح يخليكن تحسوا حالكن قاعدين بشي برج قديم ويسفركن بخيالكن على بيوت الإمبراطورية الرومانية القديمة.

شو خيالية القعدة بقلب هل بيسين لي رح ياخد من قلبكن شقفة ويضل جزء من ذكرياتكن لأن رح يعطيكن سلام وشعور فرح لا يوصف. فوق المي معلقة مرجوحة خشب ليلي بحب يدلل نفسوا على المزبوط. إجريكن بالمي، فنجان القهوة بإيدكن وجمال الطبيعية كلو قبالكن، بس تزهقوا بتكبوا حالكن على المي رح تستلقاكن.

أما النومة بقلب البيت فرح تطلعكن على سابع سما بمجرد ما تفوتوا وتشموا ريحة البيت. كل وسايل الراحة النفسية والجسدية موجودين لتغمضوا عينكن وتغفوا. بساع البيت حوالي 14 شخص، وأول ما توعوا فيكن تطلعوا من الشباك وتستمتعوا بإطلالة بانورامية على الجبال والوديان. رح تسمعوا كمان صوت المي عم يروح ويجي بدينيكن ويجي عبالكن تغطسوا جسمكن على الفيقة بالبيسين، ما تتردوا، عيشوا الحلم على الآخر. وبس تطلعوا من المي، حضروا ترويقة ملوكية مع فنجان قهوة وجيبوا كتابكن المفضل لتسرحوا بصفحاتو.

السعر للفيلا كلا هوي 450$ على الليلة الوحدة، ولكل حدا عبالوا يحجز أو يستفسر عن الموضوع ما إلو غير يتصل بأصحاب البيت.

الرقم: 559 884 03

٢. بيت كاتالبا Catalpa Home، بيت الدين

بيت الدين مدينة الأمرا المعنيين حاملة معها تاريخ غني بالوجدان والعنفوان والجمال. وبس توصلوا على بيت الدين، في جوهرة مخباية ناطرتكن بقلب هل بلدة. كاتالبا من أجمل وأغرب بيوت الضيافة الموديرن بلبنان، بيتميز بوجود بيسين بقلب أوضة النوم ولي عبالو بيرخيها بقلب المي وبيتفرج على شي فيلم هوي ومغمور بالمي من كل الميلات. أوضة النوم مريحة وكبيرة، بتلاقوا بقلبها قعدة لزيزة وبار وكل وسايل الراحة ناطرتكن، وبيتمتع كمان بجنينة بتطل على مناظر طبيعية خلابة وبقدم ترويقة تحت الشجرة الصبح.

تجربة بتستاهل تعيشوها ولو لمرة وحدة بحياتكن بس لأن رح تخليكن تحسوا حالكن بشي فيلم من الخيال. في أجمل من إنو تختموا الصيفية بقلب البيسين، مع جاط فواكة وكوكتيل وهوا الشوف المنعش! وشو يعني رومانسية بدون بيسين دافي بقلب أضوة النوم متل هيدا؟

السعر للبيت كلو هوي 350$ بنص الجمعة و400$ بالويك-أند على الليلة الوحدة، ولكل حدا عبالوا يحجز أو يستفسر عن الموضوع ما إلو غير يتصل بأصحاب البيت.

الرقم: 089 093 03

٣. كاسادار Casadar، عنايا

كاسادار أو “بيت الدار” فاتح أبوابو لكل مين عبالو يعيش تجربة غريبة بنص الجبل. جوهرة جرود جبيل المخفية، الواحة الهادية يلي فيكن تقصدوها لتسترخوا بنهاية الأسبوع لما بدكن تهربوا من عجقة وتلوث المدينة. بتطلعولوا عن طريق جبيل وبتوصلوا بعد شي ربع ساعة، الطقس برود، غير شكل والهوا نقي وبفرفح القلب. كاسادار مألف من 5 أوض نوم وبيت حجر عندو فيو بطير العقل على جبال عنايا مع ديكور خشب وحجر من جوا.

فيكن تتخايلوا حالكن عم تسترخوا بهيك محل وترجعوا بعدين تروحوا تاكلوا أطيب أكل بقلب هل قطعة من الجنة. النومة بهيك محل بتحسسكن إنكن بشي أويتل ببلد تاني وكل صبح بانتظاركن أشهى ترويقة ممكن تتخايلوها. من فوق عالتراس فيكن تتأملوا أحلا منظر للجبال والوديان، تأكدوا كمان إنو فيكن تستمتعوا بأطيب الوجبات الخفيفة والمشروبات حد البيسين.

غير هيك، فيكن تنزلوا على الclub house بقلب المشروع وتستمتعوا بالنشاطات الحلوة. بس بتعرفوا شو أجمل شعور؟ تقعدوا بلقب الميات ونسمات الهوا عم تغنجكن من كل الميلات. رح تحسوا حالكن فوق فوق فوق لأن البيسين قاعد عراس الجبل ومش بس هيك رح فيكن تعيشوا أجمل تجربة نقينالكن ياها هل صيفية: نومة على تخت مرجوحة معلق فوق المي. هل نومة رح تاخدكن على عالم كلو سحر متل بالقصص… وتخايلوا أكتر حدا بتحبوا نايم حدكن وعم يتغزل فيكن!

الأسعار ببتبلش من 160$ وبتوصل ل1560$ على الليلة الوحدة حسب خياركن، ولكل حدا عبالوا يحجز أو يستفسر عن الموضوع ما إلو غير يتصل بأصحاب البيت.

الرقم: 059 019 03

حققوا حلمكن بقلب الجبل!

شوفوا كمان، أجمل بيت ضيافة بالبترون فيكن تقضوا ليلة في.