بيت المينا: لقمة بيت وأطايب طرابلس مع جو تراثي

من أجمل الأماكن اللي ممكن تكتشفوها بطرابلس هي أحياء المينا، شوارع وزواريب زغيرة غنية بالتراث والتاريخ العريق. بتلاقوا بين هالشوارع مكان جديد ومميز، خلونا نتعرف عليه. بيت المينا، مطعم بلقمة بيت، بيقدم أطايب طرابلس مع جو تراثي.

بيت المينا عبارة عن مطعم بيتميز بقعدة تراثية وبيتوتية. جوهرة مخباية بطرابلس، بتلاقوا دار مغطى بشجر الرمان، النقشات القديمة، شبابيك القزاز الملونة، القناطر الساحرة. وأحلى شي قعدة البلكون اللي بتروق الراس على كباية شاي سخنة.

هالمطعم بتحسوا جايي من الحكايات القديمة بكل تفاصيله، حجرو القديم وقعدته اللي بترجعكن بالزمن لورا. مكان مميز لتمزمزوا بفنجان قهوة الصبحيات على رواق.

بيت المينا بيستقبلكن على ترويقة تقليدية بالدار، أو بوفيه على الغدا من كل أطياب طرابلس وأكلاتها التراثية، أو عشا مميز على أنغام العود والموسيقى القديمة.

بتلاقوا كل شي بيطلع عبالكن من الطبخات التقليدية، ورق العنب، الرز ولحمة، صيادية، الكبة برمان، وغيرها من الأكلات المعمولة على أصولها ومقدمو على سفرة كريمة ومرتبة. وأكيد ما تنسوا تجربوا الحلويات الطرابلسية من ديات أصحابها.

الحلو انو كل الأكل معمول من تحت ديات ستات طرابلسية، وبيعود كل ريعه على صندوق المنح الجامعية وهو مشروع مقدم من جمعية رواد التنمية، مؤسسة غير ربحية عم بتساعد الناس بطرابلس.

للمزيد من المعلومات أو الحجز، إتصلوا على 698 454 81

شوفوا كمان، ٦ مطارح لتعيشوا فترة الزمن الجميل بلبنان