٦ مطارح لتعيشوا فترة الزمن الجميل بلبنان

كلنا بعدنا منحن لإيام الزمن الجميل وقت كان كل شي يمشي على الهدا… بس كانت الليرة تحكي وبس كانت شوارع بيروت مليانة حركة وبركة والناس عايشة ببحبوحة. رزق الله على هل إيام الحلوة لو ترجع! توجهوا على هل مطارح إذا عبالكن تعيشوا تجربة لبنان الزمن الجميل من جديد.

١. قهوة 60، صيدا

قهوة 60، كافي على الموديل القديم بخليكن تحنوا لأيام زمان مع كل فنجان قهوة و طبق أكل.

مستوحى من إيام الستينات، بس تفوتوا علي رح ترجعوا بكاسيت التاريخ لورا وتعيشوا متل ما جدودنا كانوا عايشين.

الرقم: 000 196 79

٢. الفلمنكي، الروشة & السوديكو

هيدا المحل بيحكي قصة أكل لبنان التراثي و القعدات لي ما بتنتسى. برجعكن على إيام اللولو وقت كان لبنان وكانت بيروت بألف خير. عندكن مجال تجربوا الأكل اللبناني التقليدي على الأصول، الطاولة بتضلها مليانة وصحنكن ممييز. وما بتمكل القعدة بدون دق طاولة!

رح تلاقوا ذكريات من الماضي اللبناني بكل زاوية، قطع على الطاولات فيها صور وكلمات لأساطير الغناء اللبناني. أما فرع الروشة فبيتميز بمنظر خلاب على صخرة الروشة.

الرقم: 456 323 01

٣. بوك بزار، حمرا

رح تنغرموا بهل محل من أول نظرة… محل كتب قديم مليان ذكريات ومشاعر. بس بمجرد ما تدخلوا رح يدب فيكن الحنين بس تلاقوا قسم مليان كتب وصور قديمة لبيروت.

من صور فيروز للقطات جميلة من شوارع بيروت إيام ستينيات القرن الماضي لبوسترات الأفلام القديمة، رح تضيعوا بهل محل لساعات.

الرقم: 726 333 03

٤. 18 سفنتي 18seventy1، ساحل علما

بتتذكروا إيام اللولو لي بتحكي عنا صباح؟ هل محل جوهرة لولو مخفية بجونية. هوي بار تاريخي بقلب ساحل علما، عم يحتفل بتاريخ لبنان العريق عن طريق جمع حبنا للكوكتيلات والبيوت التراثية اللبنانية!

بتقدروا تستمتعوا عندن بمشروبكن المفضل إنتو وقاعدين بين الذكريات القديمة، ومنها البوسترات القديمة، الصور وغيرها من القطع النادرة مع منظر حلو ببورد القلب.

الرقم: 861 881 71

٥. متحف نابو، الهري

هل متحف بيحمل اسم إله الكتابة والحكمة ببلاد ما بين النهرين، وبيعرض مجموعة مميزة من القطع الأثرية من العصر البرونزي والحديدي، وصولاً للقطع الرومانية، واليونانية، والبيزنطية والفينيقية وحتى الميسوبوتامية. كمان، بيعرض أنواع متنوعة من المخطوطات النادرة والقطع الأثرية من الثقافة اللبنانية المعاصرة.

بيعملوا معارض رائعة من فترة لفترة، وكمان بيعرضوا مجموعة من الأعمال الفنية المحلية، الإقليمية، الحديثة، والمعاصرة لفنانين لبنانيين.

الرقم: 341 541 06

٦. السنفريان، جونية

إسم هالمطعم المميز بجونية رح يذكركن بغنية معروفة! سنفريان مستوحى من الغنية الشهيرة لفيلمون وهبة “سنفرلو ع السنفريان”. رح تلاقوا كلمات الغنية على حيطان المطعم مع صور فنانين الزمن الجميل متل صباح، فيروز، نصري شمس الدين ووديع الصافي.

رح تستمتعوا بغدا لبناني طيب مع عيلتكن أو تاكلوا صاج! وعندن طلة على خليج جونية على مد عينكن والنظر.

الرقم: 055 755 81

شوفوا كمان، أجمل ه أوتيلات موجودة بالجبل بلبنان.