مطعم بيرجعكن على دكان قديم بالبترون

كل مرة منمرق بسوق البترون، منلاقي جواهر مخفية وأماكن جديدة بتجارب مميزة. اليوم المطرح اللي رح ناخدكن عليه إلو قصة مهضومة حبينا نخبركن عنا. مشوا ناخدكن على مطعم نوبال، مطعم بيرجعكن على دكان قديم بالبترون.

مطعم نوبال مستوحى إسمو من فاكهة الصبّير الموسمية، مطعم جديد مخبى بعمار عمرو 400 سنة، عم تتخايلوا؟ بتبلش قصتو هالعمار من دكانة أبو منير، دكان قديم بالبترون كان محبوب على وقتو وفاتح بوابو للرايح والجايي. هالدكان كان محطة أساسية للولاد وأهل البترون وكان فيها كل شي بيخطر عبالكن من إشيا طيبة لغراض البيت والمونة.

دكانة أبو منير كانت طاوشة الدني من زمان وهلق مجرد ما تسأل عن الدكان رغم إنو سكر، أهل البترون بخبروك عنه وعن تاريخه وبعدن لهلق بيدلوا على الشارع بإسمه للدكان. مطعم نوبال بلّش قصة جديدة بدكانة أبو منير، قصة بتحافظ على تاريخ الدكان، بيحكي للناس قصتو، وبيجذب الغريب والقريب عليها بريحة الأكل الطيب اللي بتفوح بالسوق.

مطعم نوبال بيجمع بين لمسات التراث والتاريخ البتروني الغني بالقعدة المودرن والبسيطة. مكان رايق وهادي لتجربوا ترويقة غير شكل قبل ما تبلشوا نهاركن بالبترون. بيتميز المطعم بتقديم منيو أطباق موسمية، ووصفات تقليدية معمولة بطريقة خاصة وبكل حب. كل الأطباق معمولة من فواكة موسمية طيبة ومكونات فريش ومكسرات مقرمشة، والتقديم بيفتح النفس! مطعم كتير مهضوم تجربوا إذا عبالكن شي خفيف وطيب بالسوق.

لتعرفوا كل التفاصيل أو تستفسروا، تابعوا المطعم على حسابن على الإنستغرام هون.

شوفوا كمان، ١٧ من أفضل المطاعم الصيفية بالجنوب