٦ مطارح لتهربوا من الشوب هالصيفية

هالطقس المشوب ما إلو حل إلا انو نروح مشوار على مطارح نبورد فيها شوي ونغير جو. كرمال هيك، مشوا معنا على ٦مطارح لتهربوا من الشوب هالصيفية.

1. بيت الشجرة – صيدا

بيت شجرة قاعد بحضن الطبيعة وعندو إطلالة مميزة. بيقدم هالبيت تجربة هادية ومريحة بقلب الطبيعة لكل حدا عبالو يهرب من العجقة و الشوب. بتلاقوا الرواق والرفاهية بين المسبح وقعدة التراس والمناظر الحلوة بالمنطقة.

الرقم: 547 720 71

2. إرخوا أعصابكن عند كافيه Cluster 001 ببيروت

هالكافيه عبارة عن مهرب مزين بالنبات والخضار بقلب مار ميخائيل بيتميز بتفاصيل دغري بتدخل على القلب. كافيه مميز لكل محبي الطبيعة، اللي عبالن يغيروا جو ويحسوا حالن قاعدين بقلب جنينة خضرة، عندو قعدة عصرية وأصناف مميزة من الشاي وكمان قهوة طيبة.

الرقم: 554 423 70

3. بوردوا قلبكن ببوظة من الأحلام من عند Booza Society

بوظة سوسايتي واحد من أفضل محلات البوظة بالحمرا، بيعمل طعمات تقليدي وإستثنائية لازم تجربوها بوقت الشوب. كل النكهات طبيعية وغنية والبوظة عندو شغل إيد!

الرقم: 842 359 81

4. إرخوها جنب المسبح عند كانوبي بالجبل

بأيام الصيف وشوباتها، في أحلى من الطلعة على برود الجبل؟ لقينالكن مسبح غير شكل ببرمانا، مخبى بشجر الصنوبر وبين نسمات الهوا الحلو. بيقدم قعدة مميزة، مسبح كبير، أكل طيب، بيوت ضيافة، وكل وسايل الراحة والرفاهية.

الرقم: 022 023 76

5. إغطسوا بحمام تلج على الشط بالبترون

حابين تجربوا شي جديد هالصيفية؟ ناطركن على البحر بالبترون حمامات تلج غير شكل ولأول مرة بلبنان على شط Blubay ، تجربة مميزة وبتبوردكن على الآخر!

الرقم: 944 149 76

6. جربوا غدا ونزلة على النهر عند شلالات الزرقا ببعقلين

أديه حلو بهل شوب النزلة على النهر؟ مطعم شلالات الزرقا بيقدم قعدة من الخيال جنب شلالات بعقلين والنهر الجاري، قعدتو حلو وأكل على أحلى!

الرقم: 301 560 03

شوفوا كمان، ١٧ من أفضل المطاعم الصيفية بالجنوب