قصور وراها حكايات …شو قصة شارع سرسق والعيل السبعة؟

شو تاريخ شارع القصور ببيروت الفخم؟ المنطقة يلي هلأ معروفة ب-“سرسق” إلها تاريخ عريق، تعرفوا على قصصه المخباية بهالحلقة الجديدة من الذاكرة الجماعية مع الراوي طارق كوّى.

سنة 1840 ولد هيدا الشارع والقصة تبعيته بتمتد من لبنان للدولة العثمانية لمصر لفرنسا لروسيا…روسيا القياصرة.

بس قبل ما يولد الشارع خلينا نرجع مئة سنة قبل. اجا جبور سرسق على لبنان وكان عنده عيلتين احفاد بلبنان: عيلة جبيلي وعيلة برباري وكانوا ساكنين بالبربارة فوق جبيل. قعد فترة صغيرة معهن، رجع انتقل على راس بيروت ومثلو مثل كل العيل الأرثوذكسية بهذاك الوقت.

ومن ضمن هالعيل، كانوا العيل السبع. هيك كانوا يسموهن يعني بحكي عن سرسق، بسترس، تويني، طراد، داغر، فياض، وفرنيني. لحطكن بالصورة شو صار: بلشت راس بيروت يدخل عليها كتير ناس يسكنوا فيها وبالتالي هالعيل كلها صاروا يدوروا علي محل يبنوا فيها بيوت وقصور وتكون بهديك الوقت ملائمة لنوع الحياة اللي هني بدهن ياها. ومنجي لشخص من بيت سرسق: بيت سرسق هني بيزنطيين الاصل، عندهن املاك بتركيا بميرسين حتى عندهم خان سرسق باسمهن. عندهن بمصر وعندهن بفلسطين. وموسى سرسق هو الشخص يلي اخد قرار ببناء اول قصر بمنطقة الاشرافية او بحي السراسقة.

سنة 1840 بلش ببناء اكبر قصر بالاشرفية اللي هي على كتف الجميزة، وجزء من الجميزة. وطبعا العيل السبعة كمان نقوا بنفس المنطقة يبنوا القصور والبيوت تبعيتهن. وهون لازم نوقف شوي عن البيوت والقصور اللي بنوهن بيت سرسق ولمين عطوهن. يعني خلينا نبلش بمطرانية الروم يلي وهبوها بيت سرسق للمطرانية عمروا مستشفى الروم، عمروا كنيسة مار نقولا، عمروا مدرسة زهرة الاحسان.

وقصر نقولا ابراهيم سرسق راح للدولة اللبنانية هبة كمتحف. وبوج المتحف، بيت موسى سرسق او هيك بنته ايفون كانت تسميه قبل آب 2020. لازم احكي شوي عن ايفون سرسق او الليدي كوكرن كما كانت معروفة ببيروت امها كان اسمها دونا ماريا طليانية، تجوزت الفريد، الفريد سرسق هو الولد الاصغر لموسى سرسق والليدي كوكرن كانت رئيسة الابساد هذه مؤسسة انشأتها لتحافظ وتحمي المواقع الطبيعية والابنية الاثرية ببيروت.

وما حنحكي عن فخامة والتحف والموجودات بالقصر، بس اهم شيء وكانت دائما تصرر عليه، انه اللي بنى القصر معلمين لبنانيين والباب النحاسي المنقوش عامله متري طرزي. وب 4 آب 2020 صار انفجار المرفأ اهتز درج الجميزة، اهتزت القصور… او اللي بقي منها…اهتز قصر موسى سرسق. إنصابت ايفون، وبعد كم يوم، تركت البيت.

ومنرجع منكمل حي القصور.