تعو نزور أطيب المطاعم بالقليعات

إذا كنتوا بتفكروا متلنا أكيد عم بتفضلوا قعدات الجبل على الساحل بهالشوبات، وبما إنو قرب الويك-أند أكيد عم بتفكروا من هلق وين بدكن تروحوا هل السبت وهل أحد لهيك نقينالكن اليوم منطقة القليعات بكسروان لي هيي منطقة بتتميز بجمال طبيعي خلاب ومنا بعيدة أبداً عن الساحل وفيها مطاعم وكافيهات لذيذين ومكنكنين بقدموا أطيب لقمة.

١. ست سلوى

هيدا أحسن محل لتروحوا علي إذا كان عبالكن كتير قعدة مع العيلة متل تبع البيت. ديكور المطعم الحلو بحسسكن كأنكن ببيتكن وحتى أصحاب المحل كتير مهضومين. في كتير أنواع أكل لبناني عندن متل المازة، والكعك على الترويقة مع بيض عيون، وأكيد ما بدنا ننسى الشيش برك المميز وكمان معروفين بالأكل الأرمني لي بيعملوا. هيدا المطعم رح يعيشكن أجواء جبلية، ببساطة القعدة مع مونة بلدية ومأكولات شهية.

الرقم: 538 762 70

٢. لو رولي Le Relais

مارقين بالقليعات إنتو ورايحين رحلة أو عم تزوروا المنطقة الحلوة مع العيلة؟ مننصحكن تدوقوا أطيب الأكل اللبناني والطلياني هون. غير إنو عندن الplat du jour كتير طيب، المخبوزات لي بحضروها شي روعة خاصةً البيتزا. العجينة رقيقة ومقرمشة، والصوص مش تقيلة، رح تشهيكن كتير. أما القعدة مهضومة كتير وبتفرفح القلب وصراحة رح يجي عبالكن تجربوا الأصناف الجديدة والغريبة الموجودة بالمينو، الطعمة رح تاخدلكن عقلكن.

الرقم: 060 278 03

٣. لو روايوم Le Royaume

هل مطعم بيتميز بقعدة جوا وقعدة برا على التراس بس هلق بالصيفية القعدة على السطيحة أحلى كتير بهل برودات، رح تشوفوا أجمل منظر على الجبال الخضرا! ديكور المكان ساحر ومستوحى من القصور اللبنانية القديمة. أول ما تدخلوا حتحسوا حالكن بقصر لبناني فخم من إيام الستينات من خلال الطاولات والشبابيك على شكل قناطر. المنيو بيتضمن أطباق لبنانية طيبة كتير متل المازة، المقبلات السخنة من العصافير، الخشخاش والفوارغ، المشاوي والحلويات. ما فيكن تختاروا طبق مفضل، لأنو كل شي مطبوخ بدقة، وحنان كأنن أكلات بيت!

الرقم: 221 331 03

شوفوا كمان، تعو نزور أطيب المطاعم بفاريا.