طاحونة قديمة بتستقبلكن على قعدة تحت الصنوبر

بتحبوا القعدات بأحضان الطبيعة؟ منطقة بكاسين غنية بغابات الصنوبر و الطبيعة الساحرة، فقررنا نطلع على المنطقة ونخبركن عن مطرح جديد بياخد العقل. تعرفوا معنا على طاحونة حبّو بكاسين، طاحونة أثرية بتستقبلكن على قعدة تحت شجر الصنوبر.

تخايلوا هالطاحونة القديمة صرلها من سنة ال 1823 مخباية بضيعة بكاسين، بمكان رايق ومخبى عن العالم بتوصلوا عليها من درب زغير بالضيعة.

طاحونة حبّو بكاسين بعدها محافظة على تفاصيلها، حجرها الصخر العتيق، قناطرها القديمة، شبابيكها وبوابها الخشب اللي بتحكي حكايات، ودراج بتاخدكن على تراس روعة. بتلاقوا شجرة زيتون طالعة من قلب حيطان الطاحونة، مر عليها الزمن والحجر والشجر.

طاحونة حبّو بكاسين بتتميز بتراس بياخد العقل. بتطلعوا عليه من الدراج القديمة وبتوصلوا على مكان روعة. تراس بقعدات تحت شجر الصنوبر والسنديان والزيتون، قعدة بيغزل فيها الهوا اللطيف وبتطل على مناظر بتخطف القلب لمنطقة بكاسين. مطرح مناسب لسهرة بحضن الطبيعة مع العيلة أو الأصحاب!

بيقدموا مختلف المأكولات العالمية المعمولة بطريقة بيتوتية، من برغر وباستا ودجاج وسندويشات متنوعة. بتلاقوا عصير طبيعي فريش ومشروبات بخلطات طبيعية مميزة لسهرة غير شكل تحت شجر الصنوبر على أصوات الموسيقى لايف! هالطاحونة مطرح كتير مميز تجربوه هالصيفية وتقضوا فيه أحلى أوقات وتعملوا أجمل الذكريات!

للمزيد من المعلومات أو الحجز، إتصلوا على 239 085 76.

شوفوا كمان، ٤ محلات غريبة عجيبة لازم تزوروها هل-صيفية بلبنان