تعو نزور أطيب المطاعم بفاريا

ما في أحلى من إنكن تدوروا السيارة وتطلعوا على منطقة جبلية بهالشوبات وتاكلوا لقمة بيت مع منظر بياخد العقل. اليوم حبينا نطلعكن مشوار على فاريا ونعرفكن على بعض المطاعم الجبلية الموجودين بهل منطقة لكل حدا عبالو يهرب من شوبات بيروت على محل حلو وقريب بنفس الوقت.

١. جلسة العرزال

متل ما إسمو بدل علي هوي عبارة عن قعدة بقلب عرزال خشب محاط بالطبيعة والشجر، يعني فيكن تتخايلوا البرودات من هل محل شو حلوين. الأكل عندو أكل بيت وبيتوتي عبارة عن جبنة ولبنة وزعتر ومناقيش وبيض وحمص وهوي أكتر شي مشهور بالبطاطا المشوية وعندن مشاوي ولا أطيب من هيك. إنتو وجواتو رح تحسوا حالكن كأنكن ببيت بنص الغابة متل الأفلام.

الرقم: 883 285 03

٢. ملتقى النهرين

هالمطعم الجذاب قاعد على الشلال والنهر الجاري ولا أحلى من هيك! ومشهور بالقعدة الجبلية والأكل لي كتير طيب بالاضافة إلى المازة. جمعوا الأصحاب والعيلة ودوقوا أكل لبناني كتير طيب مع كل المقبلات يلي بحبها قلبكن، والنهر عم يمشي تحتكن. ويلي عبالو قعدة رايقة، لازم يشوف عندو مغيب الشمس ويسرد حد النهر على المرجوحة. قعدة بترد الروح!

الرقم: 606 897 76

٣. طريق النحل

بيطل هل مطعم على فاريا من العالي وهوي شرح وحلو وبيتميز بتصميم داخلي بسيط وقائمة شهية ومازة ممتازة، وبيستقبلكن إنتو وأحبائكن. أما القعدة على التراس فهيي ولا أحلى، الجبال قدامكن والأكل المطبوخ قبالكن، مشهور بتقديم الكبة الزغرتاوية باللإضافة .للمازة

الرقم: 394 737 03

٤. سابا

فتشوا على القصر الحجر الحلو بفاريا، هونيك رح تستقبلكن ريحة الأكل الexotic يلي بتشق القلب. بيتميز سابا بقعدتو الحلوة وأكلو الطيب والغريب… بقدم تجربة طعام روعة وتجربة بار كوكتيل راقية على أنغام الموسيقى الفرحة. بجبلكن طعمات الأكل البيرواني يلي بيجمع بين مجموعة رائعة من الأطباق التقليدية المتعددة الثقافات من اليابان والصين وأفريقيا وإسبانيا وإيطاليا وصولاً للبنان.

الرقم: 444 676 70

صراحة ما في أجمل من لبنان وما في أجمل من فاريا!

شوفوا كمان، تعو نزور أطيب المطاعم بفقرا.