تعرفوا على Planit: دليل سياحي بياخدكن حول كل لبنان 

قد ما برمتوا البلد، رح يضل في كنوز وجواهر مخباية نكتشفها بلبنان، وما بتكمل الصيفية من دون المشاوير والمشاريع الحلوة! وطالما قرّب موسم الضهرات والطقس الحلو، اليوم رح نخبركن عن تطبيق Planit المميز، بخليكن تبرموا لبنان كلو وتخططوا لكل مغامراتكن بس بكبسة وحدة!

خلونا نتعرف على Planit سوا:

تطبيق Planit عبارة عن دليل سياحي ممتاز لكل مشاويركن حول لبنان، بتلاقوا مختلف المطارح المميزة من الشمال للجنوب، أهم النشاطات وال Events اللي عم بتصير، وكل التفاصيل اللي ممكن تحتاجوها ليكمل المشوار.

الهدف الأساسي من التطبيق هو كسر الروتين والتعرف على لبنان من خلال مغامرات ومشاريع متنوعة حول البلد، وهالشي ييشجع الكل على السياحة الداخلية من جهة ونتعلم نعيش اللحظة من جهة تانية!

إذا بتلاقوا حالكن محتارين وين تضهروا أو مش عارفين وين تروحوا، تطبيق Planit بيهون عليكن الخبرية كلها، بتقدروا من التطبيق تفتشوا بليستات واسعة على أحلى المطارح والنشاطات والمهرجانات، والحلو انو المستخدمين بيقدروا يحصلوا على عروضات حصرية بتخلي تجربتهن مميزة.

ومش بس هيك! كمان التطبيق بيقدم مساحة لإستضافة رواد الأعمال اللي حابين يعرضوا شغلن ومشاريعن ويوصلوا للناس، هالشي طريقة سهلة لدعم المشاريع المحلية.

كيف فينا نخطط على Planit:

الخطوة الأولى انو تنزلوا التطبيق على هاتفكن من خلال الـ App Store أو ال Google Play، أول ما تدخلوا بتعملوا حسابكن الخاص وبتقدروا من بعدها تتصفحوا كل الخيارات على رياحتكن، وبميزة ال Filter بتقدروا تحددوا بالزبط شو نوع النشاطات اللي عم تفتشوا عليها أو المناطق اللي حابين تبحثوا فيها.

تطبيق Planit بقدملكن خيارات واسعة لتخططوا ضهراتكن على رواق وبكل سهولة، والحلو انو بتقدروا بخاصية ال Favorite تضيفوا المطارح اللي حابين تزوروها بالمستقبل على قائمة مفضلاتكن حتى ما تحتاروا وين تضهروا لا اليوم ولا بكرا!

شو؟ مستعدين تمشرعوها مع Planit؟