٦ محلات بلبنان بتقدم كعك طيب ومميز

خاطر عبالكن كعكة سخنة وطيبة وتحميصتها غير شكل؟ عملنا برمة على كذا محل للكعك وجبنالكن 6 مطاعم بتقدم كعك مميز وطيب!

1. Food Vaccine ،الضاحية

هالمطعم بالضاحية بيقدم كعك طرابلسي بيشهي وكمان سندويشات كعك متل الفاهيتا والطاووق وحتى كعكة كنافة على التحلاية!

الرقم: 148 759 76

2. Kaak Station ، الحمرا

هالمطعم بقلب الحمرا بيتفنن بالكعك، عندو كعكة بيبروني بيتزا مميزة تجربوها على الغدا، أو حتى كمان كعك البرغر، بس لازم تدوقوا من عندو كعكة البيتزا مع أربع أنواع جبنة لكل محبي الجبنة الدايبة والطيبة.

الرقم: 181 747 01

3. Kaakeh Square ، مار مخايل

بتلاقوا هالمطعم بمار مخايل وبيقدم كعك بطعمات تقليدية مميزة متل الجبنة والزعتر، بس ضروري تجربوا عندو كعكة اللبنة والمكدوس أو كعكة بيض بالقورما لترويقة غير شكل وبتشهي، وكمان عندن كعكة حلاوة إذا عبالكن شي طيب وحلو.

الرقم: 095 568 01

4. كعكة بيروت، الأشرفية

مطعم كعكة بيروت بيستقبلكن على الكعك التقليدي المعمول على أصوله، عندن الكعك محمص غير شكل وقرمشتو مميزة، وكل لقمة أطيب من التانية ومحشية بأطيب المكونات والخضرة والصوص.

الرقم: 547 444 71

5. Al Tom Delights ، طرابلس ، حلما، جبيل، والمنية

حلويات التوم عندو فروع مختلفة وبتقدروا تجربوا عندو مش بس أطيب أنواع الحلويات العربية، بس كمان كعكة المفروكة محشية كاجو ولوز وطعمها حلو!

الرقم: 555 225 06 (طرابلس) – 998 944 09 (جبيل) – 244 696 26 (حلبا) – 633 464 06 (المنية)

6. Eddy’s Street Food ، فرن الشباك، ذوق مصبح، بترون، جل الديب

أديز بيقدم كعكة طرابلسية غير شكل وبيعمل الكعكة على الفحم فبتطلع طعمتها مميزة، بتجي محشية بالجبنة على الآخر!

الرقم: 663 011 81 (ذوق مصبح) – 171 113 81 (جل الديب) – 599 200 81 (البترون) – 021 211 81 (فرن الشباك)

شوفوا كمان، وين أطيب لفات بوظة بلبنان؟ لقينالكن ٥ محلات!