قصص بتصير معكن بس تسافروا مع عيلتكن برات لبنان

أحلى تجربة بتكون لما تقرروا تعملوا سياحة كعيلة مع بعضكن برات لبنان، في كتير إشيا بتصير بيعملوها بس العيل اللبنانية وأكيد أغلبيتكن عشتوها إذا سافرتوا مع أهلكن، تعو نتعرف عليها.

١. بتجي كل عيلتكن الكبيرة تودعكن على المطار وبصير الكل بدو يتصور معكن وببلش البكي والدموع

٢. أول ما توصلوا على البلد الجديد رح تتفاجأو لأن رح تلاقوا عطول في كهربا ومي، شي مش قاطع علينا

٣. أكيد في يلي بضل بدو يصور كل شي بيعملوا وكل فشخة بيفشخها

٤. يلي بصير بدو ينزل صور بالدزينات على فايسبوك ليشوف حالو إنو مسافر

٥. على طول في أحاديث جارية عن لبنان وكيف صار لبنان هيك

٦. دايماً في شخص فاتح فيديو مع رفقاتو بلبنان وبتكونوا ما صرلكن يومان مسافرين

٧. أهم شي بس يبلش حديث المقارنة بين لبنان والبلد لي مسافرين علي، على أساس صرلكن دهر برا وبتعرفوا كل شي

٨. دايماً في حدا عم بوثق كل شي عم بصير على غروب العيلة على الواتساب

٩. يلي بضل محمس وحامل الmaps بين إيدي وبدو يكتشف محلات جديدة

١٠. إذا ضيعت إمك وإختك بتلاقيهن بالmall يلي حد الأوتيل عم يعملوا شوبينغ أو منتشرين بالمحلات الموجودين بالشارع عم بيتبضعوا

١١. أكيد إمك بتقرر تجيب هدايا لكل النسوان لي بتعمل معن صبحية ولولاد عمك وخالتك والجيران وولاد المختار

١٢. عطول في هيدا الشخص بالعيلة لي ما إلو جلادة يعمل شي، بيرخيها بالأوتيل وبقضيها نوم كل النهار

١٣. أهم شي بس تفيقوا ركض كل يوم الصبح على الترويقة وبكون بعد في بس خمس دقايق وبسكر المطبخ

١٤. دايماً في حدا بدو يحشي الشنطة غراض ما إلا عازة ليطلع بالآخر معكن وزن الشنط زايد على المطار وتدفعوا زيادة

١٥. لو قد ما كانت سفرتكن حلوة، رح تشتاقوا كتير للبنان بكل علاتو وما رح تصدقوا كيف ترجعوا

١٦. أكيد أول مارح تغط الطيارة بمطار بيروت رح تزقفوا وتزلغطوا

شوفوا كمان، ٣٢ جملة غريبة عجيبة بتشوفوههن بس على الباصات اللبنانية.