أجمل بيوت بحضن الشجرة: عيشوا تجربة مميزة بالمتن

مين فينا ما بحب يهرب كم نهار من عجقة المدينة لمطرح رايق وبعيد عن العالم؟

اليوم المطرح اللي رح ناخدكن عليه خص نص لمحبي المغامرة والتخييم بالطبيعة، Seven Oaks عبارة عن “بيوت الشجرة”، بيوت ضيافة بشكل فريد جاهزة تستقبلكن بأحضان منطقة عين التفاحة بالمتن.

هالبيوت الخشبية قاعدة بحضن الشجرة فوق الأرض، مع منظر عن التلة بياخد العقل بحسسّكن إنكن معلقين بالسما.

بيت ال Monkey Mansion بيتميز بقعدة خشب وقزاز مع منظر مفتوح على الغابة، أمّا بيت Owl Nest بينفرد بقعدة الخيمة اللي بتناسب عشاق التخييم مع منظر مفتوح على السما والنجوم. بتلاقوا أوضة نوم بتخت مريح لشخصين ومطبخ زغير لتعملوا أطيب عشا وحمام مع دوش معلّق بقلب الشجرة.

هالقعدة الساحرة مخباية عن العالم، بتناسب العشاق لعطلة رومانسية ممتازة بأحضان الطبيعة، بتقضوا ليلة من العمر مغمورين بالشجر والخضار، بتفيقو الصبحيات بكل رواق على صوت العصافير، وبتشربوا قهوة مع بعض بعالمكن الخاص.

بتقعدوا على المرجوحة أو على التراس وبتقروا شي كتاب، وأكيد ما تنسوا تجربة البانيو بقلب الشجرة، بترخوا حالكن بالميّ الدافية وبتسرحوا بالمناظر الحلوة بالغابة.

بالليل، بتسهروا مع النجوم وبتعملوا مارشميلو على النار وبتلعبوا Board games مع بعض، وكل وسايل التسلية والراحة متوفرة داخل هالبيوت!

شو رأيكن، بتجربوا هالقعدة؟

للمزيد من المعلومات، اتصلوا على 191 934 70

شوفوا كمان، حلبوسا: أوتيل من عالم الخيال بضيعة القبيات

تعرفوا على أجمل بيوت الضيافة حول لبنان هون.