٧ مطاعم مميزة تجربوها بهالشوبات

بلشتوا تحسوا بالشوبات؟ شو رأيكن ناخدكن كزدورة حلوة حول لبنان نبورد فيها مع بعض وناكل شي طيب؟ لقينالكن 7 مطاعم مميزة بلبنان خص نص لهل طقس.

1. مطعم الشلالات الزرقا – بعقلين، الشوف

في أحلى من قعدة بتبورد القلب جنب الشلالات؟ مطعم الشلالات الزرقا قاعد جنب نهر بعقلين، بيتميز بإطلالة ساحرة بالطبيعة وأكل لبناني طيب. ضروري تجربوا القعدة بالشختورة المليانة ورد مع حدا عزيز، يعني غدا رومانسي من الأحلام!

الرقم: 301 560 03

2. مطعم النهر – بسكنتا

مطعم النهر مخبى بمنطقة بسكنتا وبيقدم قعدة تراس فوق الميّ الجارية، أكلة سمك مقلي مع أطيب مازة لبنانية وسلطات، على أنواعها وأحلى شي هون نسمات الهوا اللطيفة.

الرقم: 197 288 04

3. مطعم جزيرة عنجر – عنجر، البقاع

عبالكن أكلة سمك مشوي وجاط تبولة على صوت الميّ والبط؟ ميلوا على منطقة عنجر الأثرية بالبقاع، رح بتلاقوا مطعم جزيرة عنجر جنب النهر، هالمطعم بيقدم أكل طيب، نشاطات ممتعة، طلعة بالشختورة، وقصص كتير حلوة!

الرقم: 340 810 03

4. مطعم بحيرة بنشعي – بنشعي، زغرتا

إذا طالعين على زغرتا بهل طقس، ضروري تجربوا مطعم بحيرة بنشعي على ضفاف البحيرة، بتدوقوا أطيب كبة زغرتاوية، لقمة مشاوي مميزة، بتتفرجوا على البط والوز بالمي، وبتطلعوا بالشختورة بقلب البحيرة.

الرقم: 500 550 06

5. مطعم وادي شمسين – برالياس، البقاع

مطعم وادي شمسين بيستقبلكن على قعدة ساحرة الجمال جنب البحيرة، مع نشاطات ممتعة بالميّ للولاد والعيلة، غدا لبناني طيب تحت فيّ الشجر بالجنينة، وعالم مليان جمال، من أروع المطاعم لتجربوها مع العيلة بهل طقس المشوِب.

الرقم: 377 677 81

6. مطعم الشلالات – بقرزلا، عكار

ناطركن بقلب ضيعة بقرزلا بعروس الشمال مطعم جار الشلال وصديق النهر، بيقدم أشهى كبة نيّة ممكن تجربوها على قعدة من العمر بأحضان الطبيعة.

الرقم: 980 684 03

7. مطعم لوس – جزين

عبالكن لقمة لبنانية على تراس بالجبل؟ ما في أحلى من طلعة الجبل بهل طقس ومطعم لوس عندو وحدة من أجمل وأروق القعدات بجزين جنب شجر الصنوبر وبالهويات الحلوين، عدا عن أطيب الأطباق اللبنانية.

الرقم: 330 780 07

.شوفوا كمان، ٤ مطارح حلوة لازم تجربوها بطرابلس