أطيب ٩ محلات بوظة عربية بلبنان

في شي أطيب من البوظة؟ أكيد ولا شي أطيب بس يمكن البوظة العربية أطيب من كل شي… من لقمة بوظة مسقعة عم وتتمرمغ بالتم لأطيب كباية بوظة معرمة بالطعمات لخلطات ونكهات عربية أصيلة.

بالنسبة إلنا، هول من أفضل المحلات لي بيعملوا بوظة عربية بلبنان، وأكيد بعد في غيرن كتير!

١. عساف ملك البوظة، الغبيري

هيدا المحل بدل إسمو علي، هوي عنجد ملك البوظة العربية بكل معنى الكلمة. بتلاقوا عندو كل الطعمات لي بتحبوها وبترغبوها.

كل شي معمول على الإيد وفريش، نصيحة تعوا على معدة فاضية بهل شوبات وعبوا قرن مشكل من كل الطعمات ما رح تندموا ورح تنصدموا من الحجم الكبير والطعمة لي بتبورد النفس والقلب.

الرقم: 162 094 81

٢. بوظة العنتبلي، كافة الفروعة

من أطيب واشهى قوالب البوظة العربية، كمان عندو أطيب نكهات الكوكتيل مع فواكي متل الفريز والكيوي وغيرها.

كباية البوظة عندو بتجي معباية بالنكهات اللذيذة وما بتمط أبداً بتدوب بالقلب وما تروحوا على حالكن المري كريم.

الرقم: 212 991 01

٣. بوظة القزيلي، زوق مكايل

ألوان هل بوظة بتلون اللسان والتم، مشهور بجودة البوظة وطعمتها المميزة، سر الخلطة إنها طبيعية وفريش… أطيب طعمة عندو القشطا الطبيعية لي رح تبوردلكن قلبكن مع رشة فستق على الوج.

فيكن كمان تستمتعوا بالبوظة بقلب فخارة، الفخار بيضبط الحرارة وبحافظ على البرودة وبخلي طعمة البوظة غير شكل.

الرقم: 706 670 03

٤. حلويات الشدياق، مينة الحصن-بيروت

محل صرلو فوق ال100 سنة عم بقدم أطيب الحلويات العربية مع لمسة غريبة.

بيشتهر بخلطة خاصة بالبوظة رح تخليكن تنغرموا من أول لقمة وعندو نكهات عربية مختلفة لازم تجربوها.

الرقم:603 363 01

٥. بوظة الرملاوي، صيدا

بوظة الرملاوي بوظة طبيعية مشكلة وكمان عندن طعمات وخلطات سرية بتاكلو صابيعكن وراها متل بولات البوظة على فواكي وأطيب شي على مانغا وقشطا وفستق.

كريمة البوظة لي فيها طبقة الفستق المقرمشة بتخلينا ندوب بطعمتا- خصوصي إذا كان في أكتر من طعمة ولون.

الرقم: 140 720 07

٦. بوظة حنا متري، الأشرفية

محل صار من تراث المنطقة وأكيد إذا ما بتعرفوا سامعين في. اشتهر بجودة البوظة وطعمتها المميزة، سر الخلطة إنها طبيعية خالية من .الألوان والقصص الإصطناعية، حكيت عنو الصحف العالمية متل نيويورك تايمز، لوفيغارو وغيرن

ومن سنين بعدو لليوم عم بلون يومياتنا بأطيب نكهات البوظة العربية وريحتها بتشق النفس والقلب… أكتر شي رح تحبوا طعمة الورد.

الرقم: 356 254 03

٧. بوظة رشيد عطا، زحلة

بيت البوظة العربية، بحضر على إيدو أطيب وأشهى أنواع البوظة، عندو أطيب النكهات متل الورد، القشطا، الفستق، التوت البري وغيرن. الطعمة والريحة ما فينا نوصفهن، وصراحة الكمية مخيفة قد ما كبيرة وكريمة.

يعني لو بتبرموا لبنان كلو ما رح تلاقوا متل هل بوظة. عندو بوظة طليانية كمان، كوكتيلات واختراعات لذيذة بحبات الفواكة.

الرقم: 433 824 08

٨. بوظة مارون، بشري

مارون بيعمل بوظة دق بمواد طبيعية ولا أطيب، من الفواكة للشوكولا والفانيلا والحليب. بيعمل كمان إختراعات كتير مهضومة متل البوظة على كيوي وبوظة على تين وجوز وبوظة على أناناس.

وفي شي ضروري تجربوا كمان، بوظة الباناناتيلا لي هي عبارة عن مزيج بين طعمة الموز والكراميل لي بتمغط وبتدوب بالتم.

الرقم: 195 288 03

٩. بوظة البردوني، زحلة

معقول نحكي عن أطيب محلات البوظة العربية وما نجيب سيرة بوظة البردوني؟ لي فينا نقلكن يا إنو المشوار من آخر الدني على البردوني لتجربوا البوظة الملكية هون مش بس حرزان. وحسب أصحاب المحل، البوظة لي عندن بتعطيكن سعادة وبتغذيكن وبتخليكن ترخوا أعصابكن على الآخر.

جربوا كعكة البوظة الزحلاوية المشهورة عندو، لي مش بس طعمتها روعة وكمان شكلها من برا كتير مرتب: كعكة بوظة مغطسة بالفستق مع لوز ومحشية أطيب طعمات الفواكة.

الرقم: 733 823 08

يلا على البوظة يا حلوين!

شوفوا كمان، أطيب ٦ محلات كوكتيل بلبنان