٤ مطارح حلوة لازم تجربوها بطرابلس

قررنا اليوم نطلع على مدينة طرابلس ونكتشف جواهرها المخفية. كفوا المشوار معنا وخلونا نتعرف سوا على 4 مطارح روعة لتجربوها

بطرابلس.

1. أوتيل فيكتوريا بوتيك

أوتيل قديم مخبى بمينا طرابلس، بيضم كافيه مهضوم وغرف من الأحلام، بيتميز بالديكور الرومانسي الساحر، القناطر العالية، جلسات على البلكون، شبابيك خشب وقعدات القديمة، مع جنينة ساحرة الجمال لتقعدوا تتونسوا فيها بعد نهار حلو بالمنطقة.

الرقم: 204 529 76

2. سارة وكريم

كافيه سارة وكريم بيتميز بطابع فني وقعدة لطيفة بقلب طرابلس، معروف بتقديم مختلف أنواع الكيك والحلويات الطيبة بكل شطارة وحب، متل كيك الليمون والفريز، أو كيك دوبل تشوكلات لمحبي الشوكولا، أو كيك الفستق ومي الورد بطعم مميز. هالكافيه من أحلى المطارح لتعملوا صبحية بطرابلس، وتجربوا ترويقة طيبة مع قهوة مميزة وقطعة حلو!

الرقم: 705 219 06 – 711 505 76

3. شاورما أبو صبحي

برمتوا بطرابلس كلها وصار وقت الغدا، شو رأيكن تجربوا شاورما أبو صبحي؟ هالمطعم بيقدم وحدة من أشهى ساندويشات الشاورما بلبنان لكل حدا بيحب يدلع بطنو، وإذا منبلش عند أبو صبحي ما منخلص! كل شي عندو طيب وبشهي، ساندويشات الشاورما دجاج مع طربوش توم، سندويشات الشاورما لحمة، فتة الشاورما، رز وشاورما، وشو ما يخطر عبالكن من أطباق غير شكل وبتفتح النفس!

الرقم: 720 433 06

4. شيف باستا

شيف باستا داوخ الدني بطرابلس بالباستا اللي بيعملها، هالمحل بيجمع الجو الشعبي اللبناني والأكل الإيطالي بمطرح واحد. بيقدم طعمات باستا مميزة، معمولة مع بهارات طيبة وخلطات سرية، وأهم شي منظر الجبنة الدايبة اللي بتمغط، شي بشهي على الآخر!

الرقم: 083 499 70

شوفوا كمان، لقينالكن أطيب ٤ مطاعم مخباية بعنجر