٦ محلات ترفيهية للولاد مناسبة للربيع

اليوم رح نخبركن عن بعض النشاطات والمهرجانات والمراكز يلي مناسبة للولاد لتقضوا نهار ممتع مع العيلة بهل طقس الحلو.

١. مهرجان الربيع، البترون

خدوا ولادكن على البترون وخلوهن يحسوا بجو الفرح والسرور بمحل بعيد عن بيروت وعجقتها.

شو رح تلاقوا بالمهرجان؟ موسيقى وعزف مباشر، أغاني، كيوسكات خشب، نشاطات فنية وترفيهية، محلات، ألعاب للأطفال، كيوسكات أكل وشرب وحلو، ومعرض للمنتوجات محلية.

الرقم: 525 702 76

٢. مطعم بيوماس، جربتا

على طريق القديسة رفقا رح تلاقوا هل مطعم المهضوم لي بيتمتع بقعدة قش على العشب الأخضر، بحضر كل أنواع الأكل البيتوتي والطبخات لي بتستحلوها.

كل لي عليكن تعملوا تجيبوا ولادكن وتخلوهن يفلتوا بهل مساحة الخضرا ويلعبوا، ياكلوا أكل طيب وبغذي وكمان يلعبوا بالألعاب ويناموا على التكايات ويقضوا نهار من العمر.

الرقم: 532 532 03

٣. فان سكوار Fun Square، جناح سنترو مال

في أحلى من إنو تشوفوا ولادكن عم يلعبوا وينطوا من الفرح؟ وعنجد هيك رح يصير عند Fun Square، هل محل مليان ألعاب مسلية للولاد ونشاطات غريبة عجيبة… فيو ترامبولين وألعاب كتيرة منوعة للولاد وصالة لتعملوا فيها أعيد ميلاد مميزة.

الرقم: 090 979 81

٤. مطعم H Village، جونية

شو أقرب شي على قلب ولادكن؟ ما بدا تنين يحكو فيا، أكيد الأكل الطيب. مطعم H Village عبارة عن قرية زغيرة فيا كل شي بيخطر على بالكن والقعدة عندو على البحر. المينو غني وبضم أكتر من محل، سلم على البحر، سوشي هوليك، ذا بوسطا، Desserts and Fruits وكمان كحول بار. يعني ولادكن فين ينقوا ويستحلوا وبس يخلصوا يرجعوا يتحلوا. رح يحسوا حالن كمان بشي جزيرة بعيدة ومش بس هيك عطول بيعملوا جو حلو بالمطعم وبحطوا موسيقى.

غير هيك، كل يوم أحد، عم يعملوا شي مهضوم للعيل يلي محتارين شو يعملوا بهل نهار، بوفي مفتوح وبار مفتوح وترفيه خاص وعرض موكب وجولة بالبحر وألعاب مائية وقصص كتير مهضومة وبتسلي الولاد.

الرقم: 700 333 71

٥. بيروت باي بايك Beirut By Bike، وسط بيروت

الولاد بكيفوا بس يعرفوا إنو رايحين مشوار وأكتر شي بينبسطوا بس يكون في ألعاب بالدق. بما إنو الطقس بعد منو شوب كتير، أحلى فكرة بتكون إنكن تاخدوا الولاد على وسط بيروت، تستأجروا بيسيكليت وتبرموا بيروت سوا.

هل محل بقدم بيسيكلاتات مسلية للكبار والزغار طول النهار وبخليكن تكتشفوا شوارع بيروت من عيون مختلفة. تجربة حلوة ومهضومة لكل عيلة!

٦. بيتزا نابولي، كفرحزير-الكورة

شو أقرب شي بحبوا الولاد؟ أكيد البيتزا ولأن منعرف هيدا الشي كتير منيح، رح نعرفكن على هيدا المحل المليان بيتزا وأكل طيب. بيتزا نابولي صرلو من سنة ال 1984 فاتح وبقدم أشهى أصناف البيتزا وحتى الكرسبي والبرغر.

البيتزا عندو لبنانية مية بالمية: عجينة رافخة مع أطيب مكونات متل الهوت دوغ والزيتون وجبنة على الوج. وفي من كل الأصناف والأحجام لي بترضي أزواق الولاد ومش بس هيك، في قعدة جوا وعلى التراس ومحل مخصص للألعاب ليتسلوا ولادكن على الآخر.

الرقم: 355 952 09

شوفوا كمان، لقينا ٦ مطاعم بأنفه مع منظر بطير العقل.