٦ محلات فيكن تعملوا فيهن بيكنيك بلبنان

قعدة بقلب الطبيعة، منظر حلو، أكل طيب وشرشف أحمر وأبيض… مين عبالوا بيكنيك؟

بضل البيكنيك أهضم مشروع بهل طقس وأقل كلفة من قعدة المطاعم خاصةً إذا كنتوا مجموعة كبيرة، لهيك خلينا نعرفكن على محلات فيكن تعملوا فيهن بيكنيك بلبنان.

١. لو كامب، دير الحرف

هل محل قاعد بين شجر الصنوبر بقلب منطقة خضرا بتطل على أجمل منظر طبيعي، بس توصلوا رح تلاقوا محل لتعملوا قعدة بيكنيك وتحضروا أكلاتكن، طاولات ومقاعد خشب… بتمدوا الحصيرة وبتقعدوا وأكيد فيكن تشووا وتحضروا أكلكن بقلب الطبيعة. ليلي عبالوا ينام بقلب الغابة، بتلاقوا خيم جاهزة تستقبلكن لأجمل نومة.

الرقم: 677 355 76

٢. مطعم ببوماس، جربتا

من أجمل المطاعم لي قاعدة بأحضان الطبيعة، بتلاقوا عندن مطعم سدح مدح بين الخضار مع قعدة قش بين شجر الزيتون، بقدم أطيب الأكلات البيتوتية. وإذا حابين تعيشوا تجربة البيكنيك على الأصول بيعطوكن حصيرة وسلة فيها كل شي طيب ممكن تاكلوا مع فواكي وبرنيطة لتعيشوا التجربة على الآخر. جربوا تناموا على العشب، لتستمتعوا بالطبيعة الحلوة وتسترخوا بجو من الهدوء العميق. وفي كمان ألعاب للولاد وتكايات لتسترخوا!

الرقم: 532 532 03

٣. مغراق، عبدلي

بس توصلوا على ضيعة عبدلي لي غرقاني بالمي رح تشعروا إنكن صرتوا بفيينا. هل ضيعة غرقاني بالمي وبقلبها رح تلاقوا بيت مهضوم خشب جاهز يستقبلكن. بتجيبوا معكن أكلاتكن وبتسردوها بقلب هل بيت وبتاخدوا أحلى الصور وبتروقوا راسكن. بتنبسطوا بهل محل بحفلة مشاوي، وفيكن كمان تنامو بهل بيت وتوعوا الصبح تاخدوا فنجان قهوة فوق هل قطعة من الجنة على الأرض.

الرقم: 118 861 71

٤. حدائق راس مسقا، طرابلس

من أجمل الجنينات بلبنان، بتقعدوا بين الشجر وبترخوها. المقاعد ملونين وكتير مريحين، فينا نقول المشوار بيستاهل عذابو، أول شي رح تلاحظوا هوي الحصان، فيكن تاخدوا مساحة خاصة فيكن وترجعوا تستفيدوا من النشاطات الموجودة بهل مكان. ما تنسوا تاخدوا معكن كاميرا لتعيشوا التجربة على الآخر.

الرقم: 470 170 79

٥. أرصون فيلادج، أرصون-المتن

هل محل الساحر قاعد بقلب غابة صنوبر بتاخد العقل، فيكن تحجزوا بانغالو وتناموا بالطبيعة وإذا عبالكن بس بيكنيك ما إلكن غير تجوا وتجيبوا معكن غراضكن، بتلاقوا طاولات وكراسي لتقعدوا على رواق وتستمتعوا بالمنظر الحلو والأكل الطيب وتتنشقوا الهوا النقي. في كمان مطعم لإذا عزتوا شي.

الرقم: 111 228 71

٦. فريحة فالي Freiha Valley، دير الحرف

هل محل قاعد بقلب غابة بعيدة عن الضجة وعن العالم، المنظر من هل محل بيحبس الأنفاس. خدوا المنقل وأكلاتكن المفضلة وكونوا أكيدين لو وين ما بتقعدوا على طاولتكن وكارسيكن عسفوح هل الغابة العظيمة رح تقضوا نهار بياخد العقل بالطبيعة. ما في أجمل من غياب الشمس من هل نقطة!

الرقم: 835 946 03

شوفوا كمان، سمعتوا عن بيت الضيافة الساحر على المينا بطرابلس؟