هيك فيكن تقضوا أحلى نهار بمنطقة بنشعي

بنشعي من أجمل المناطق الشمالية، فيا بحيرة ساحرة، خضار ولا أحلا لشخاتير زغيرة، سوق نابض بالحياة، مطاعم وطقس بياخد العقل. كل شي هون روعة! بيقصدوها مين بحبوا يقضوا الويك-أند خارج المدينة يلي تعودوا يعيشوا فيا أو بس ليوم واحد ممتع بكل معنى الكلمة.

خلينا نعرفكن على هل منطقة ونخبركن شو فيكن تعملوا فيها!

وين فيكن تاكلوا؟

مطعم بحيرة بنشعي

هل محل من المطاعم الرمزية بالمنطقة، نايم على البحيرة وبقدم المازة اللبنانية على الأصول مع مشاوي ومشروبات على أنواعها وأرغيلة.

هل محل مش بس بيعمل أكل طيب وعندو قعدة من العمر كمان، عطول الجو حلو في وبيعمل حفلات فنية وبيستقبل فنانين وبيعملكن جو لبناني أصيل.

الرقم: 500 550 06

مطعم الميرادور

فيكن كمان تميلوا عند مطعم الميرادور يلي بيتمتع بقعدة بطير العقل، بقدم الأكل اللبناني والعالمي اللذيذ وكل أنواع الحلويات.

فيكن تتغدوا وتتلذذوا بالقعدة بين الخضار والشجر والبرود. إذا قعدتوا على التراس ما تنسوا تاخدوا معكن جاكيت رقيقة، لأن الهوا بعدو شوي مصقع.

الرقم: 336 550 06

وين فيكن تتسلوا؟

اشتكشاف بنشعي

تمشوا حد البحيرة وعيشوا الطبيعة وتفرجوا على الهندسة التراثية بالضيعة والخضار والشجر لي ما رح تلاقوا متلن ببيروت وشموا هوا نضيف، وأكيد ما تنسوا تتعرفوا على الناس الطيبة والبشوشة هون.

بيبقى الأهم إنكن تنزلوا على البحيرة وتشعروا بروح المنطقة من خلال منظر المي الروعة. بحيرة معروفة بنضافتها وجمالها، عمد العين والنظر، حلوي ومليانة حياة، بيسبح عوج البحيرة بط ووز فيكن تشوفوهن عن قريب وتصوروهن.

النشاطات المائية والترفيهية

هل بحيرة الرائعة ما بتخلا من السحر الشخاتير الزغيرة والمناظر الطبيعية والنباتات البرية النادرة والزهور الملونة، اطلعوا بالشخطورة وخلوا حالكن تنبسطوا بهيك كزدورة، تعرفوا على ناس جداد وعملوا جولة بالمي.

حديقة الحيوانات ومتحف الحيوانات المحنطة

زوروا حديقة الحيوانات المهضومة لي الكبار الزغار بينبسطوا فيها وتعرفوا على مختلف أنواع الحيوانات.

زوروا كمان متحف الحيوانات المحنطة، بيتكوّن هل متحف الأكبر من نوعو بلبنان من طابقين وبيحتوي على أكتر من 3000 حيوان محنّط من جميع أنحاء العالم!

فنجان قهوة

بس تخلصوا أكل وبرمتكن حول البحيرة فيكن تشربوا فنجان قهوة على صوت المي وتتلذذوا بكل لحظة حلوة بهل منطقة لي بتشبه الجنة على الأرض.

محمية حرش إهدن

إذا عشتوا كل شي حلو وعبالكن تشوفوا بعد قصص حلوة، زوروا محمية حرش إهدن واكتشفوا الجواهر الطبيعية الجبلية (شجر الأرز، الصنوبر والشوفان وغيرن) وورود على مد النظر، عصافير وينابيع مي. ونصيحة جيبوا معكن قناني مي فاضية وعبوا من مي النبع، ولا ألذ! وأكيد ما تنسوا تجيبوا الكاميرا لتاخدوا أحلى الصور!

الرقم:601 601 70

سيدة الحصن

وبس تخلصوا حملوا حالكن واطلعوا على سيدة الحصن وشوفوا منظر المغيب من أجمل نقطة بإهدن وروقوا راسكن على الآخر.

وهيك بتكونوا قضيتوا أحلى نهار ببنشعي!

شوفوا معنا كمان، مشوار على بشعلة: ١٢ شغلة تعملوها بهل ضيعة المميزة.