أجمل كزدورة للولاد: شوفوا هل ٦ مطارح المهضومة

عم تفتشوا على مطارح مهضومة لتعملوا أجمل الذكريات مع الولاد؟ مشوا معنا مشوار زغير على أجمل المطارح لأحلى مشوار مع العيلة والولاد.

1- أنيمال سيتي – زكريت

بتعيشوا عند أنيمال سيتي تجربة لزيزة مع الحيوانات البرية على اختلافها، حديقة حيوانات مميزة لتاخدوا الولاد مشوار ويتعرفوا على الحيوانات عن قرب وياخدوا صور مهضومة ويقضوا وقت كتير ممتع.

ولتعرفوا شو بعد مخبيلكن هل محل من نشاطات، شوفوا المقال هون.

الرقم: 115 171 76

2- Swings Camp – زرعون، المتن

إذا ولادكن بحبّوا المغامرة والأجواء الحماسية، هالمخيم بالمتن عندو ألعاب وتحديات بتناسب الزغار والكبار، جو للتخييم كتير حلو، أكل طيب بالكافيتيريا، ومساحة مهضومة ليتعرفوا على أصحاب جداد.

الرقم: 648 796 03

3- Moonlight Farm and Resort – الباروك

بتلاقوا بمنتجع مون لايت قرية سنافر مهضومة، بيوت زغيرة، بركة مي، وألعاب حلوة بقلب جنينات، وبيت ضيافة إذا عبالكن تكفوا النهار هونيك، هيدا عدا عن المناظر الطبيعية المميزة!

الرقم: 339 133 71

4- ع الضيعة – قصبة، الكورا

عبالكن تركبوا الخيل مع الولاد بمزرعة مهضومة؟ أو عبالكن تقضوا وقت ممتع بين الشجر وجو الضيعة؟ كل اللي عليكن تعملوا، تميلوا صوب “ع الضيعة” بمنطقة الكورا لتعملوا أجمل الذكريات مع الولاد – رح تعيشوا أجواء عائلية مميزة.

الرقم: 390 707 71

5- تارا زينة – جبيل

ما في أهضم من كزدورة على التوك توك بقلب جبيل مع الولاد! مشروع تارا زينة بياخدكن أجمل برمة بالمينا والسوق العتيق والمطارح الحلوة والتراثية بجبيل، مشوار كتير مميز للعيلة والولاد!

إذا حابين تعرفوا أكتر عن خبرية المشروع، شوفوا المقال هون.

الرقم: 088 950 71

6- بيو ماس – جربتا

اطلعوا صوب مطعم بيو ماس البيتوتي، بتلاقوا الجنينات والباحات الواسعة المليانة ألعاب للولاد ناطرتكن، عدا عن المناظر الطبيعية الحلوة، وجو الريف والمزرعة اللي بقرّبنا من تراثنا.

الرقم: 532 532 03

شوفوا كمان، أطيب ٥ مطاعم جنب الشلالات مع قعدة من الأحلام.