شوفوا معنا ٢٢ متل لبناني مهضوم عن شهر نيسان

ما في أهضم من الأمتال اللبنانيي يلي بتخبرنا كيف كانوا جدودنا يشوفوا الحياة وأضحك شي أمتال أشهر السنة. من بعد ما خبرناكن عن أمتال شهر شباط وآدار، اليوم إجا دور شهر نيسان. ١. شتوة نيسان بتحيي الأرض والإنسان ٢. بنيسان الحصيدة وين ما كان ٣. بنيسان طفي نارك وفتاح شبابيك دارك واسباح بالشمس لزنارك ٤. شتي نيسان خير وصحة للإنسان ٥. شتوية نيسان بتساوي السكة والفدان والقرقه والصيصان ٦. نيسان السبل … سقعتو بتهد الجبل ٧. بنيسان بتصير الدني عروس وبخففوا الناس الغطا واللبوس ٨. بشهر نيسان بتفقس الصيصان ٩. بنيسان بيدفا كل إنسان ١٠. بين العقرب والنيساني ارفاع غطاك الفوقاني ١١. كانون فحلها.. ونيسان محلها ١٢. نيسان بلا شتا متل العروس بلا حلا ١٣. بنيسان بيدوب التلج وبيبان المرج ١٤. بس يجي نيسان حضرولوا الفنجان ١٥. سقعة السبل بترمي الجمل وهوا نيسان بيشقق القمصان ١٦. نيسان لسانو فلتان ١٧. بنيسان بتشتي عشية وبتمشي الصبح محفية ١٨. بنيسان فلاح الأرض سيان لأن الري بسابق الخيال ١٩. بنيسان بتزهر البساتين وبيحلا السيارين (المشاوير) ٢٠. بنيسان بيفتح التوت وبقلوا للبرد روح موت ٢١. بنيسان حنوا حالكن يا نسوان ٢٢. بنيسان بتسرح الغزلان وبيفتح البستان