قعدة من العمر…أطيب ٧ مطاعم بأحضان الطبيعة

عبالكن جمعة حلوة على غدا بأحضان الطبيعة؟ لبنان متل الجنة على الأرض، غني بجبال ووديان وأنهار وبحيرات وشلالات وغابات غنية باالسحر والجمال الخلاب. مشوا معنا نشم هوا نضيف بهل طقس الحلو، نبعد عن العجقة ونروق راسنا ب7 مطاعم حول لبنان بأحضان الطبيعة الحلوة.

1- جلسة ورد – يحشوش

مطعم مليان ورد وقاعد على الجبل بيحشوش، بيقدم أطيب سفرة مشاوي وكمان صاج طيب، عندن جنينات بتاخد العقل وقعدتن بتناسب العيل مع الولاد والجمعات الكبيرة.

الرقم: 014 273 03

2- هوا جرجوع – جرجوع

عبالكن قعدة بيسرح فيها نظركن وبتفرفح القلب؟ بتلاقوا بمنطقة جرجوع الجنوبية مطعم هوا جرجوع، قاعد بأحضان الجبال والواديان المليانين شجر وغابات، عندو أطيب لقمة مشاوي على منظر بيطير العقل!

الرقم: 427 535 07

3- بيت الجبل – دير القمر

أديه دير القمر ساحرة؟ بيت الجبل بهل منطقة عبارة عن مطعم بأحضان الطبيعة وبيوت ضيافة على الموديل القديم، إطلالته عالجبل وقعدتو من الصخر تحت الشجر بردوا الروح، كمان عندن بيتزا على الحطب مميزة وبيعمل أطيب بوفيه بالمنطقة.

الرقم: 767 160 71

4- لا ميزون دو لا فوري – بكاسين

لا ميزون دو لا فوري بيقدم قعدة عاللبناني بأحضان أكبر غابات الصنوبر بلبنان والشرق الأوسط! عندن أطباق لبنانية على الترويقة الغدا والعشا، بين كل كدشة وكدشة بتضيعوا بمنظر شجر الصنوبر العتيق، وإذا عبالكن، فيكن تقضوا الليلة ببيوته الخشبية بقلب الغابة.

الرقم: 252 828 78 – 222 800 07

5- مطعم تلة نصر – بكفيا

بتميلوا عند مطعم تلة نصر وبتقعدوا على التراس ولفحات الهوا اللطيفة بتاخدكن وبتجيبكن معها، إذا بتحبوا القعدة الجبلية جنب شجر الصنوبر مع أطيب لقمة لبنانية، هالمطعم كتير رح يعجبكن!

الرقم: 549 983 04 – 404 690 71

6- لوس – جزين

كاس عرق وسفرة مليانة أصناف مازة، مشاوي مشكلة ولقمة لحمة نية بتفتح النفس، كل هل غدا جنب شجر صنوبر فارش حالو على أجمل منظر، من أجمل وأطيب المطارح لتتغدوا بقلب جزين.

الرقم: 330 780 07

7- مطعم شلالات الزرقا – بعقلين، الشوف

مخبى بمنطقة بعقلين وعندو قعدة من العمر، بتلاقوا عندو اللقمة الأصيلة على صوت الشلال، الجلسة جنب المي، والمناظر الطبيعية اللي بتاخد العقل، هالمطعم بكملّكن مشواركن بالشوف على المزبوط.

الرقم: 301 560 03

شوفوا كمان، ٨ من أجمل المطاعم على البحر حول لبنان.