٥ أشياء بتلاقيها بكل بيت لبناني بس مستحيل تكبّها

بكل بيت لبناني منلاقي كتير قصص سخيفة وبلا عازة بس مستحيل نفكر نكبها أو نستغني عنها:

١- علبة البسكويت/ الخياطة الشهيرة

هيدي العلبة دمّرت ولا تزال عم تدمر أحلام وآمال كتير ناس لسببين: الأول إنو العلبة بتنحط بمكان عام وعلى الأعين يعني ما فيك ما تمدّ إيدك وللسبب التاني إنو بقلبها عدة خياطة مش مثلًا نوع بسكويت تاني. وعلى الرغم من هالشيء ما منسترجي نبدلها بعلبة تانية. خالدة…

٢- ريموت كونترول (Remote Control) ملزّق من راسو لكعبو

وين ما منروح وكيف ما منبرم مستحيل ما نلاقي هالريموت كونترول يلي مغلّف من فوق لتحت بتلزيق أو بس من تحت يعني ليمسك تسكيرة البطارية. الحلو بالموضوع إنو بصير التلزيق يقشر ويتوسخ وينجوي وبرضو ما منشتري غيرو علمًا إنو حقو ماكس ١٠،٠٠٠ ليرة.

٣- كياس بلاستيك

صحيح إنو منشتري باكيت كياس للقمامة بقياسات وأحجام كتيرة بس هيدا الكيس الكبير يلي بقلبو كياس صغار بيتعلق وراء باب المطبخ شي حتمي ولا بدّ منّو. لشو هالكياس ولشو هالكترة ما حدا بيعرف. والأحلى إنو في حال قررنا نستعمل كيس من هالكياس منقلبو على الوج التاني قال إنّو أنظف!

٤- علب الأكل (Tupperware)

صحيح إنو علب الأكل خط أحمر بكل بيت لبناني وخصوصي عند كل إم لبنانية وصحيح إنو كتير مهمين ومفيدين للحياة اليومية بس هول العلب يلي ما إلهن غطاء يلي منزويّين بكل خزانة مطبخ لأيَّ بلي ؟ مستحيل نشتري غطاء إلهن خصوصي ومستحيل تنكسر علبة ويزبط هالغطا على العلبة هيديك. وبرضو ما منكبون أبدًا.

٥- أعداد لا تُعد ولا تُحصى من DVDs وCDs

ما حدا منّا ما أدمن من صغرو على الأفلام وألعاب الكمبيوتر يلي كنا نشتريون من حد البيت ب١٠٠٠ ليرة الCD وحضرناهن ميت مرة وكبرنا وصرنا نحضر يوتيوب وكبرنا بعد واشتركنا ب Netflix وبعدن هال CDs كلون عنا. منّك لبناني إذا ما إنت أو أهلك عندك فيلم أسد وأربع قطط أو تجربة دنمركية أو سلسلة أفلام High School Musical.