حابين تتعلّموا لغة جديدة؟ إليكن أفضل مراكز تعليم اللّغات ببيروت!

اللبناني مشهور بحبه وشغفه للغات ولو معرفته للغة بتقتصرعلى كلمتين تلاتة. مش بس هيك. اللبناني بفشخ بهل كم كلمة يلي بيعرفهن بشكل إنو بيربط كل الكلمات واللغات يلي بيعرفها بجملة وحدة. منهيك حبينا ندلكن على أفضل مراكز ومعاهد بتعلم لغات أجنبية ببيروت:

١. مركز بيرلتز للغات (Berlitz)

هيدا المركز متواجد بالحمرا. هو معروف عالميًا وإلو فروع بأكتر من ٧٠ بلد. هالمركز بخليك تختار اللغة والهدف من التعليم. يعني بتختارإذا بدك تتعلم هاللغة بدافع العمل أو المتعة أو الهجرة. والحلو إنو فيكن تدرسوا ضمن صفوف خاصة أو جماعية.

٢. المركز الأمريكي اللبناني للغات (ALLC)

مشهور هيدا المركز المتواجد بسن الفيل بكترة اللغات يلي بقدّمها من الإنكليزية والصينية والألمانية والإسبانية والإيطالية والفرنسية. اللغة عادة بتنقسم لعدة مستويات من مبتدئ لمتقدّم. والحلو بهل مركز إنو بقدّم الدروس مرتين أو ثلاث مرات في الأسبوع على مدار شهرين إلى ثلاثة أشهر ليخلص مستوى كامل مما بساعد أكتر على إتقان اللغة.

٣. مركز التعليم الأمريكي (ALC)

‎بركّز هيدا المركز المتواجد بالحمرا بشكل أساسي على تحسين مهاراتك باللغة الإنكليزية. بقدّم دورات خاصة باللغة الإنجليزية للأعمال واللغة الإنجليزية للأغراض الخاصة متل بداعي الهجرة والعيش في الخارج. والحلو إنو هالمركز بقدّم دروس باللغة العربية العامية والرسمية يعني الأجانب بلبنان فيهن يتسجلّوا في ليعرفوا كيف يعيشوا ويتواصلوا.

طبعًا ما فينا نحكي بلغة أجنبية وما نذكر المراكز التابعة للسفارات والحاصلة على دعم منهن. يعني إذا بدك تتعلم اللّغة الاسبانية ما إلك إلّا معهد سرفانتس (Instituto Cervantes) الموجود بوسط المدينة. هالمركز ما بيعطي إلّا صفوف باللغة الإسبانية وغالبًا بتتلاقى بأساتذة ومواطنين إسبانية وحتى في مكتبة لاستعارة القصص والأفلام الاسبانية لتقوية اللغة.

أمّا إذا بدكن تتعلموا اللغة الألمانية ما إلكن إلّا معهد غوته (Goethe Institut) المتواجد بالجميزة. الحلو بهل مركز إنو يلي بدو يقدم على لمّ شمل أو هجرة إلى ألمانيا مفروض يكون ناجح بامتحان اللغة بالغوته. هيدا الامتحان المُعترف في الوحيد بلبنان.

كذلك الأمر للّغة الايطالية يلي بعلّموها حصرًا بالمركز الثقاتي الايطالي Instituto Italiano Cultura المتواجد بالحمرا – شارع روما… هيدا المعهد بخليك تتعلّم اللغة الايطالية بطلاقة. مش بس هيك بخلوك تتعرف على الحضارة والثقافة الايطالية من خلال المسرحيات والحفلات التثقيفية يلي بتحضرها بشكل مستمّر.

وهكذا دواليك.