١٠ عبارات لبنانية حيّرت البشرية

في عبارات بيحكيها كلّ لبناني وبيسمعها بشكل يومي بس ياترا في مرة جرّب يفكّر فيها؟ بيعرف معناها؟ هيدا اذا إلها معنى أصلا!

١. “شو في ما في”؟: السؤال الشهير لما شخص بدو يفتح معك حديث. يعني عم تسألني “شو في” وتجاوب “ما في” أو كيف الخبرية؟

٢. “إذا صار ما صار حكيني”: شو هوي اللي صار ما صار؟ كيف بدّي احكيلك اللي ما صار؟

٣. “انت هون؟!”: ضروري يستخدمها اللبناني لما بيتفاجئ بوجود شخص! بتكون قاعد وفجأة بيسألك هالسؤال! والجواب المهضوم أكيد: لا هونيك! أو هيدا خيالي!

٤. “شو هالريحة؟! وطّوا الموسيقة“: مستحيل ما تصير مع كل عيلة لبنانية.. لمّا تضهرو بالسيارة وبِشِمّ بيّك ريحة حريق، ريحة بنزين، أو حتّى ريحة مشاوي! فورا دغري بقول وطّو صوت الأغاني. بس شو الرابط؟ وشو خصّ الشمّ بالسمع؟ يعني يا ترى اذا وطّينا الأغاني منشمّ أحسن؟ اي ممكن!

٥. “مش طاصِس قدامك؟”: وقت يِكسُر عليك موتسيك أو سيارة ويخبطك أو حتّى ما يخبطك بس انو أكيد بَراس اللبناني كان ممكن تصير كارثة، بتطلع هالعبارة! ليش شو هيّي طاسس؟ اه يعني شايف؟ اوك…

٦. “نسيتها! بس ع طرف لساني”: كيف ع طرف لسانك؟ بالمرحلة الأخيرة لتوصل على بالك ما فهمت؟ والأحلى هيداك السئيل اللي بقول طب مدّ لسانك لشوف الكلمة!

٧. “مش عارف راسو من إجريه”: مين؟ كيف؟ معقول؟

٨. “مخوّر”: شي طبيعي يقولها اللبناني ليعبّر عن جوعو. يعني ب هاللحظة مستعدّ يقِشّ الأخضر واليابس!

٩. “بلا ما أرجيك نجوم الظهر”: وهون لما يكون التهديد خطير.. بغيّر اللبناني مجرى الفلك.. بطلّع الشمس بالليل وبيترك القمر والنجوم ل النّهار.

١٠. ” شي تك تك شي تيعا”: العبارة اللي عجز العلماء والمفكّرين والفلاسفة وحتى العباقرة يفسّروا كلماتها! بس اللبناني أكيد بيعرف ولو؟ كلّ الخبرية إنّو الموضوع مش عاجبو ولا على زَوقو!