لمحبي الفول والمسبحة ما بقا تحتاروا وين الترويقة

الترويقة اللبنانية مش بس مناقيش وصاج متل ما بفكروا الأجانب. هي أكتر من هيك بكتير بالنسبة لمحبي الفول والمسبحة ومشتقاتن. من هيك قررنا نقدملكن أطيب محلات الفول بمدينة بيروت وأكيد ما بتندموا.

مطعم أبو حسان وأولاده:

من أطيب محلات الفول أبًا عن جد. المطعم إلو فرعين الأول عل المنارة هيك بتاكلوا صحن الفول وبتكفوا مشيتكن على المنارة والفرع التاني ببرج حمود. المطعم مشهور بنظافته والسرعة بتلبية الطلبات والأكيد إنو لح تدوقوا أطيب بيض بأورما ببيروت.

مطعم السوسي:

بيكفي نعرّف عنه إنو ال CNN بحدّ ذاتها إجت على لبنان لتزور هل المطعم الأثري وصنفته المطعم رقم ١ لأفضل ترويقة بالعالم. صح المكان شوي ضيق بس بخليكن تتعرفوا على شوارع وزواريب بيروت الضيقة والقديمة وتستمتعوا بأطيب لقمة بيروتية.

مطعم الوليد:

إزا من محبي الفتة بلبن وبطحينة توجهوا دغري على محلات الوليد أو اطلبوا دليفري من فرعه على الملّا أو على البسطة. طبق الفتة بيوصل غني بالقلوبات وسخن وكأنك عم تصب الزيت السخن بإيدك على الفتة بالإضافة لعلبة خبز مقلي على جنب لمحبي الفتة الدسمة.

لو بروفيسور:

اسمه بعرّف عنه. المطعم موجود بمنطقة مار الياس ومعروف بأشهى وأطيب أطباق الفتة بلبن والفتة بأورما والمسبحة ببيروت بسبب طريقته الخفيفة بتتبيلة الفول والحمص.

مطعم كنانا:

انشهر مطعم كنانا بجاط الخضرا يلي بينزل على السفرة بدون سابق تصوّر وتصميم. الخدمة سريعة وصحن الفول عندو ما بيتفوت. صحيح أسعاره شوي غالية بس بيستاهل.

وألف صحتين!