اكتشفوا معنا أطيب المطاعم بعروس الجنوب جزين

جزين متل الجنة على الأرض بلبنان، مغمورة بالصنوبر العتيق ومشهورة بشلالاتها العريقة، بتتميز بالصناعات الحرفية وكروم العنب والمونة المميزة. اليوم رح ناخدكن كزدورة على أطيب المطاعم بعروس الجنوب جزين الأصيلة!

1- مطعم الحرش – جزين

مطعم الحرش محبوب بالمنطقة، بيتميز بقعدة تراس بتطل على أجمل المناظر الطبيعية، وبيقدم اللقمة اللبنانية الطيبة بكل فنية وكرم!

الرقم: 111 780 70

2- مطعم الشالوف – جزين

عشاق اللحمة النية بيعرفوا منيح أديه مطعم الشالوف شاطر بتقديم هالأطباق الشهية على مختلف أنواعها، وكمان المازة عندو ما بتدوقوا متلها بجزين كلها! وفوق هيك، بيتمتع بالقعدة الساحرة جنب شلالات جزين.

الرقم: 774 781 07

3- Blue Jay Valley – جزين

عبالكن عرق بلدي ولحمة نية جنب الشامينه؟ مطعم بلو جاي فالي مميز بالقعدة الونسة وأطباق الفخارة المغنّجة والمشاوي الشهية وبيوت الضيافة الساحرة، بتقضوا كم يوم من العمر بربوع جزين وبتنبسطوا أد الدني!

الرقم: 088 880 78

4- La Maison de La Forêt – بكاسين، جزين

تخايلوا معنا انكن معزومين عغدا طيب بغابة الصنوبر ببكاسين! La Maison de La Forêt عندن مطعم بأغنى وأكرم سفرة لبنانية، المازة عندو كتير مميزة والمشاوي طعمها غير عالم والسلطة بتاخد العقل أد ما طيبة!

الرقم: 222 800 07 – 252 828 78

5- مطعم لوس – جزين

الشطارة والأصالة بالأكل بتلاقوها عند لوس، إذا عم تفتشوا على تجربة أكل ما بتنتسى، لوس بيقدم قعدات ساحرة ودافية، صحون مليانة لراسها، مشروب غير شكل، وطعمة بتميزو عن غيرو من المطاعم، ضروري تجربوا لما تطلعوا على المنطقة.

الرقم: 330 780 07

6- Les Caves Roum – جزين

قعدة كهف من حجر، شيميني دافية، جو رومانسي، نبيد مميز، وأكل لبناني وعالمي ولا أطيب، وكل لقمة ألذ من التانية! ما رح تشبعوا من مطعم Les Caves Roum، قعدة وجو وأطباق بتفتح النفس.

الرقم: 126 000 76 – 292 810 07

7- كيف جزين – جزين

مطعم كيف جزين بيقدم تجربة أكل مختلفة عن المطاعم التانية، الأكل بلدي وطازة من المزرعة، الطبخات عاللبناني والوصفات بيتوتية، هالمطرح بعيشكن جو الضيعة والريف الرايق، بتشموا ريحة الأرض بكل زوايا المطعم وبتقضوا وقت مميز، بس ما تنسوا انو ضروري الحجز قبل!

للحجز: 449 441 70

شوفوا كمان، تعرفوا على ٧ مطاعم بالجنوب بقعدة خيالية.