٥ محلات خرج قعدة مهضومة مع الأصحاب ببيروت

وين الضهرة اليوم؟ إذا زهقتوا من القعدة بالبيت وعبالكن تموهوا وتروحوا على شي محل قريب لتغيروا جو، رح نخبركن عن ٥ محلات فيكن تزوروهن ببيروت لتقضوا وقت حلو وتنسوا همومكن والمشاكل اليومية.

١. لابارتومان L’appartement، الأشرفية

محل مهضوم كتير بشارع سيوفي رح يحسسكن بالراحة النفسية من أول ما تفوتوا، عندو جنينة مهضومة كتير وقعدة حميمة خرج أصحاب ومجموعات. زهقوا تروحوا على نفس المحلات؟ رح تحبوا ستيل المحل كتير original، بحضر قصص خرج لقمشة وبقدم مشروب والقعدة المثالية مع جبنة ونبيد وكمان فيكن تجيبوا معكن حيواناتكن الأليفة. وأكتر من هيك ما في أحلى من هيك محل لأخد الصور!

الرقم: 076 343 03

٢. سيرينا، راس بيروت

عبالكن تجربوا شي جديد؟ ما في أحلى من إنكن تعيشوا مغامرة مهضومة ولذيذة مع الناس لبتحبوهن وتعملوا ذكريات حلوة وهل محل بقدملكن هل شي على طبق من فضة. هوي عبارة عن مطعم هندي بيتميز بقعدة لبنانية أصيلة وبجبلكن كل أطباق المطبخ الهندي لي بعد مش مجربينها بحياتكن متل الساموسا والباكورا وسلطة ساتاي. إذا كنتوا من محبي الرز والنكهات القوية والمختلفة على الأكيد رح تنبسطوا بالأكل وأكيد لازم تعيشوا هل تجربة بهل محل لأن مثالي من كل الميلات، القعدة والأكل والجو الحلو. وما في أجمل من هيك مغامرة بس تكونوا كتار!

الرقم: 739 853 70

٣. سيب، الجميزة

هل محل عبارة عن قهوة مهضومة مكنكة بقلب شوارع الأشرفية، لكل حدا عبالوا فنجان قهوة وقطعة حلو وما إلو خلق على عجقة المطاعم. قعدة خفيفة نضيفة بتشرح القلب، فيكن تجربوا عندن الهوت تشوكولات لي بدفي البطن بهيك طقس مع قطعة غاتو أو ساندويشة وكمان عندن مناقيش زغار، يعني كل شي بيستحلي قلبكن بس تكونوا قاعدين مع أصحابكن موجود. وبالنهاية أكيد القعدة الحلوة ما بتكمل إلا مع الصحبة والرفقة الحلوة.

الرقم: 569 567 01

٤. كوان بيردو Coin Perdu، الرميل

هل محل المهضوم رح ياخدكن رحلة على شوارع نابولي الشعبية من ورا أكلو الطلياني الأصيل من البيتزا على أنواعها، السلطات، الباستا وأنواع الحلو الإيطالي متل التيراميسو والبوظة الإيطالية والبان بيردو. هل محل عبارة عن كنز مخبى بيعمل أطيب أكل، بيستمتعوا في الأصحاب والأحباب بجو رومانسي بنسيكن هموم الدني كلا.

الرقم: 724 332 01

٥. توت بيروت، الحمرا

متل ما بتقول الغنية الشهيرة “توت توت عبيروت”، هل محل رح يعيشكن التجربة البيروتية الأصيلة من خلال كل تفاصيلو! القعدة مريحة كتير وفي كنبايات وكراسي مرتبين كتير، رح تلاقوا كل الطبخات البيتوتية يلي بحبها قلبكن بهل محل عدا عن المشاوي والبطاطا والأكلات اللبنانية الشهيرة، الكوكتيل، المناقيش وفنجان القهوة اللبناني الأصيل. فيكن تجوا تلعبوا دق ورق أو طاولة أو حتى تسولفوا وتنسوا همومكن شوي لأن غير الأكل، القعدة ييتوتية بتريح النفسية والخدمة بتجنن.

الرقم: 166 756 01

شوفوا كمان، ٥ محلات جديدة لازم تزوروها بلبنان هل ويك-أند.