٦ محلات فيكن تطلبوا منن مناقيش زعتر وجبنة غير شكل

شو في شي أطيب من منقوشة الجبنة أو الزعتر؟ أكيد ولا شي … كرمال نعرفكن على أفران بيعملوا مناقيش طيبين غير المحلات المعروفين بالعادة، رح نعمل جولة على ٦ محلات من حول لبنان لازم تجربوها.

١. فرن أبو داوود، الجديدة

القعدة عندو كتير مهضومة متل قعدة الضيعة، هل فرن المهضوم بحضر كل أنواع المناقيش والفطاير وبيعمل منقوشة زعتر عليها جبنة بتشهي. وأكيد ما بدنا ننسى الحلوم لي فيها بندورة، العجينة رقيقة ومقرمشة، والصوص مش تقيل، رح تشهيكن كتير.

الرقم: 970 892 70

2. صاج الحنون، بكفيا

إذا بتحبوا أكتر شي مناقيش الصاج، لازم تتعرفوا على هل محل. صرلو أكتر من 15 سنة بيعجن وبيخبز وبحط على الصاج. عندو زعتر وجبنة، قاورما، سلق وكوسا، وزعتر بري وطعمات ونكهات غير شكل. ضروري تجربوا منقوشة النص زعتر نص جبنة، شي بشهي! صاج كتير طيب وبيستعملوا منتوجات محلية وكتير طازة. الماجأة الحلوة حزرزا شو؟ بيعملوا كنافة على الصاج ومنقوشة شوكوبا ولا أطيب من هيك!

الرقم: 292 593 03

٣. المعجناتي، الحمرا

يمكن أكتر شي بذكرنا بالطفولة والإيام الحلوة هني المناقيش، بس هل محل ما بيعمل حيلا منقوشة وبس، بيعمل مناقيش وبيتزا وأطيب ترويقة على الصبح: كروسان، دونتس، منقوشة ببيض وكل النكهات الطيبة. وما فيكن تقولوا ما شبعتوا بس تخلصوا.

الرقم: 766 750 01

٤. فرن طقوش، الحمرا

بيعمل مناقيش وفطاير وشخطورة منقوشة! بس تكونوا ببيروت واشتهيتوا منقوشة، ما إلكن غير تمرقوا على هل محل وتجربوا الطعمات لي غير شكل. جربوا منقوشة الجبنة مع زعتر وخضرا على الوج، رح تنغرموا بكل لقمة، بس كونوا أكيدين إنو هون بيستخدموا أجود المكونات الطازة لتحضير مناقيش ما بتتفوت.

الرقم: 040 328 76

٥. منقوشة شيبان، فرن الشباك

هيدا أحسن محل لتروحوا علي إذا كان عبالكن كتير مناقيش متل تبع الضيعة. في كتير أنواع مناقيش عندن متل الجبنة، والكشك، وأكيد ما بدنا ننسى الزعتر لي فيها خضرا، وبيتزا، ولحم بعجين. مع أنواع مختلفة من العجين والمكونات المميزة، رح تحبوا المناقيش عندو، كل منقوشة رح بترجعكن لجذور الضيعة وأصحاب المحل رح بلاقون بدفا وترحيب.

الرقم: 691 616 01

٦. أخت منقوشة، فرن الشباك

الترويقة عند هل محل إخت… منقوشة. عندن كتير قصص غريبة وجديدة متل بيتزا على طعمة المنقوشة، كل قطعة نكهة ولون، وبيتزا اخت منقوشة ومنقوشة الdouble لي بتجي محشية أكتر من طعمة. جربوا منقوشة الزعتر لي محشية جبنة بتشط وبتمط، شي روعة. عندن كمان تحلاية غير شكل بتغطسوا الخبزة بالنوتيلا وبتحلوا ضرسكن على الآخر.

الرقم: 229 638 81

ألف صحتين!

شوفوا كمان، أطيب ٤ محلات صفيحة ببيروت.