شوفوا ٧ مطاعم إيطالية ببيروت لجو الحب والرومانسية

ما في أشطر من الطليان بالرومانسية، بكل شي… أكلن ولغتن وحضارتن، وكرمال تعيشوا جو الحب والغراميات ع الطلياني، شوفوا معنا 7 مطاعم إيطالية ببيروت.

1- Appetito – الجميزة، الحمرا

مطعم أبتيتو مشهور بقعدتو البيتوتية اللي بتتمتع بكراسي خشب وشراشف بيض وحمر لي منشوفن بالأفلام الإيطالية، بهل الزاوية الزغيرة ببيروت فيكن تدوقوا أطيب الأطباق الإيطالية من السباغيتي والديافولي بيتزا ومعكرونة بالبيستو صوص المحبوبة- بتقعدوا وبتحسوا حالكن رحتوا رحلة رومانسية على روما.

الرقم: الجميزة 600 682 03 – الحازمية 249 299 03 – الحمرا 318 288 03

2- Mario E Mario – الأشرفية

إذا عم تفتشوا على مكان مهضوم لتعملوا ذكريات رومانسية ما تنسوها، مطعم ماريو إي ماريو قطعة من إيطاليا بشوارع بيروت، الجو عندو بفرفح القلب من الديكور الساحر للألوان الروعة والقعدة الإيطالية الكلاسيكية، معروف إنو من أطيب المطارح ببيروت للأكل الإيطالي التقليدي.

الرقم: 036 888 76

3- Bavaglino – الأشرفية

بتعرفوا انو بتلاقوا روما الإيطالية على درج نقولا بالأشرفية؟ مطعم بفالينو مزين بالورود والأضواء الخافتة وعندو القعدة الإيطالية الأصيلة البسيطة والمهضومة، في كل شي بتشتهوا من الأطباق الطليانية، البيتزا على أنواعها والباستا الكريمي والسلطات الطيبة والحلو الإيطالي، بتقعدوا مع الشريك وبتنبسطوا بعشا رومانسي على أحاديث ما بتخلص.

الرقم: 080 091 81

4- La Casa Di Pasta – كليمانصو

رح تحسوا بالجو الإيطالي الرومانسي مجرد ما تفوتوا على La Casa Di Pasta، معروف عنو انو بقدم أطيب باستا ببيروت كلها، بتطلع مليانة صوص ودافية، وفوق هيك قعدته غير شكل. لازم تجربوا هل محل بالشتوية لأنو أطباقو كتير بتعطي دفى وقعدتو رومانسية على الآخر.

الرقم: 453 881 81

5- Marinella Trattoria – مار مخايل

هيدا المطعم عندو قعدة مرتبة ومودرن لتقضوا عشوات حلوة و رومانسية على رواق، بياخدكن بأكلو والجو الحلو على عالم تاني، بس أكيد لازم تجربو عندو باستا اللينغويني لي بيعملها غير شكل وعلى أصولها.

الرقم: 342 442 01

6- أفانتي – وسط بيروت

طابع مطعم أفانتي إيطالي بأصغر تفاصيلو، بيعمل كل شي على الإيد وبيتفنن بالأكل وبيتميز بتحضير البيتزا على الحطب، ديكور المحل كتير فني ومرتب برجعكن على رومانسية وسحر الستينات بإيطاليا.

الرقم: 992 990 01

7- بوتشا – الأشرفية

بيعمل الباستا بيتوتية والبيتزا على الحطب، عندو جو رومانسي ولطيف لشوية حب وغراميات وأحاديث مهضومة على عشا طيب مع الشريك، ضروري تجربوا!

الرقم: 518 684 76

شوفوا كمان، مشوار على ٥ مطاعم بقعدة كهف ساحرة ودافية.