شوفوا ٧ مطاعم بتفتح ٢٤ ٢٤ ببيروت لجوع آخر الليل

الجوع لما يضرب آخر الليل ما إلو حلّ إلا تطلبوا وجبة محرزة، وإذا كنتو قاعدين ببيروت شوفوا معنا ٧ مطاعم بتفتح ٢٤/٢٤ بالعاصمة.

1- مطعم الآغا – راس النبع، اوتستراد هادي نصر الله

هالمطعم إذا بدكن لحم مشوي أو سندويش كباب أو بيتزا الساعة 4 الصبح، بتلاقوا جاهز يلبيكن.

الرقم: راس النبع 866 668 01 – اوتستراد هادي نصر الله 179 279 01

2- قهوة عزمي – السوديكو

مطعم وكافيه عزمي فاتح بوابه 24/24 ليستقبلكن على أكل لبناني وعالمي غير شكل، بقدم حصص كريمة وبتشبع خاصة إذا طلبتوا فروج مشوي على الفحم بيطلع كتير فخم وجنبو سلطة وبطاطا مقلية وكبيس وأكيد زيادة توم.

الرقم: 773 773 81

3- مطعم بربر – الحمرا، راس بيروت

بس بيخطر عبالكن سندويش شاورما دجاج خطيرة، ميلوا عند مطعم بربر المحبوب بأي وقت من النهار أو الليل!

الرقم: 866 433 03 – 855 433 03

4- Luna’s Kitchen – الحمرا

بأي ساعة من النهار، فيكن تميلوا عند لونا وتجربوا أطباق نباتية وصحية كتير بتشبّع، وكمان عندن مشروب لزيز لسهراتكن المتأخرة مع الأصحاب.

الرقم: 659 082 81

5- Breakfast To Breakfast – الزلقا

هالمحل حرفياً بتلاقو فاتح من وقت الترويقة للترويقة، بقدم سندويشات وبلايات غير شكل لتستمتعوا فيهن كل السهرية مع أصحابكن لحتى يطلع الضو.

الرقم: 290 722 04

6 – مزارع اللقيس – مينا الحصن

إذا ضرب الجوع على أطيب صفيحة بلبنان، ميلوا عند اللقيس وطلبوا اللي بدكن ياه كل النهار وكل الليل.

الرقم: 824 373 01

7- Eddy’s Street Food – فرن الشباك، جل الديب

بتلاقوا عند اديز أطيب أكل الشارع، إذا بكن شي بشبّع وعالسريع فيكن تجربوا من عندو الهوت الدوغ أو الكريب أو حتى الكعكة الطرابلسية لي بيعملها غير شكل.

الرقم: فرن الشباك 021 211 81 – جل الديب 171 113 81

شوفوا كمان، شوفوا ٤ مطارح ببيروت لتجربة أكل غريبة ما بتنتسى