أهضم مراكز ترفيه لتاخدوا ولادكن عليها بالعطلة بلبنان

كل الولاد عندن هم واحد: يفرصوا من المدرسة ويملوا وقتن باللعب والتسلية والمشاوير. ولأن الأهل عطول بيحتاروا وين يروحو بهل ولاد خاصةً بالويك-أند وإيام العطل، رح نخبركن عن أماكن ترفيه مهضومة بتحتوي على أجمل الأنشطة والألعاب يلي بتفرح ولادكن.

١. كيدزيلا Kidzilla، الفوار-أنطلياس

محل مليان ألعاب وأجواء مرحة للولاد ونشاطات ومسريحيات ورقص وموسيقى. الحلو إنو على طول بيعملوا نشاطات جديدة بتنمي حس الوعي والتحليل عند الولاد مش بس قصص للتسلية. وهلق على عيد الميلاد، عاملين قصص كتير مهضومة متل الباراد والرسم على الوج وسحر.

الرقم: 719 161 76

٢. شجرة جبيل، جبيل

جمعوا أصحابكن وولادكن وكل الناس لي بتحبوهون واكتشفوا منطقة جبيل وتفرجوا على الزينة والشجرة والمواقع الأثرية بالإضافة لوجود هل منطقة على البحر. فيكن بس تخلصوا تتصوروا حد الزينة وترجعوا تاكلوا بالمطاعم الموجودة بالسوق وتشتروا هدايا العيد وترجعوا تتمشوا بالسوق العتيق وتنزلوا صوب السنسول لتشوفوا البحر وتعيشوا لحظات ما بتنتسا.

الرقم:777 546 09

٣. دينو سيتي، جعيتا

دينو سيتي عالم خيالي رح ياخد أطفالكن على العصور الأولى ويعيشن مغامرات متل الأحلام وبيحتوي على أجمل وأكبر الديناصورات يلي بتجذب الأطفال. متحف الديناصورات بوفر للولاد من كل الأعمار الفرصة ليتسلوا ويتعلموا بنفس الوقت عن الزواحف. وفيكن تختموا جولة التاريخ والثقافة، بجلسة ممتعة للكبار جنب الحديقة مجهزة بألعاب متنوعة للزغار ومتوجة بمجسم لشخصية «KING KONG» الخرافية، وبتاخدوا حدو أحلى الصور التذكارية، ورح تلاقوا كمان مطعم عندو هندسة معمارية بتردكن لإيام زمان.

الرقم: 999 395 81

٤. كريسماس ماركت، البترون

تزينت شوارع البترون بزينة الميلاد وبستاندات عم تبيع هدايا العيد من متاجر محلية: أكل، حلو، مناقيش، ألعاب، تياب وكل شي بيخطر عبالكن. أكيد في ليموناضة كمان وألعاب كتير! فكرة سوق الميلاد بالبترون مهضومة كتير ومناسبة للعيل. في شجرة ميلاد وزينة حلوة كتير فيكن تتصوروا حدها. موسيقى، أكل، مطاعم، ستاندات هدايا، عروضات فنية ونشاطات للأطفال- هيدا بإختصار لي ناطركن بالبترون.

الرقم: 525 702 76

٥. ليتل ريد Little Reed، بيت مري

مطعم بيشبه بيت التيتا والجدو التقليدي المليان حب، محاط بالطبيعة والحيوانات وبعج بالتقاليد الضيعيجية. يعني بتجوا مع الولاد بتستمتعوا بالأكل البيتوتي حد النار وبتخلوا ولادكن يطعموا الحيوانات ويختبروا حياة القرية.

الرقم: 300 007 76

٦. سوق الميلاد، Downtown بيروت

انطلق مهرجان عيد الميلاد بأسواق بيروت تحت إسم “بيروتتنا”. بيتضمن عدد كبير من الأنشطة بالإضافة لوجود عدد من المعارض والستاندات مع أضوية وألوان وزينة وموسيقى العيد. هالبازار بيتميز بوجود عدد كبير من الحرف التراثية والعديد من المحلات ويعتبر مكان مناسب لشراء هدايا العيد للأهل والأصحاب وتناول مأكولات سريعة وحلو. الولاد كمان عندن حصة كبيرة من محلات الألعاب، ولأن كل طفل حلموا يقابل سانتا ويتعرف علي هل شي متاح بأسواق بيروت.

الرقم: 420 004 81

٧. بيتزا نابولي، كفرحزير-الكورة

شو أقرب شي على قلب الولاد أكيد البيتزا ولأن منعرف هيدا الشي كتير منيح، رح نعرفكن على هيدا المحل المليان بيتزا وأكل طيب. بيتزا نابولي صرلو من سنة ال 1984 فاتح وبقدم أشهى أصناف البيتزا وحتى الكرسبي والبرغر. البيتزا عندو لبنانية مية بالمية: عجينة رافخة مع أطيب مكونات متل الهوت دوغ والزيتون وجبنة على الوج. وفي من كل الأصناف والأحجام لي بترضي أزواق الولاد ومش بس هيك، في قعدة جوا وعلى التراس ومحل مخصص للألعاب لسيتسلوا ولادكن على الآخر.

الرقم: 355 952 09

شوفوا كمان هل- ٨ محلات لزينة ميلاد ما بتكسر الجيبة.