بيت ضيافة من الخيال عمره ٢٠٠ سنة جاهز يستقبلكن

بتعرفوا انه فيه مطرح ساحر تحت محمية أرز الشوف؟ شوفوا معنا La Maison Des Sources بعين زحلتا لي بقدملكن بيت ضيافة مع قعدة جبلية من الخيال. بالطقس الدافي بكون هواها غير شكل، وبالشتوية بتكون مغطاية ببياض التلج- كفوا معنا لتعرفوا اكتر.

منطقة عين زحلتا معروفة بالطقس الحلو بكل المواسم، والمناظر الطبيعية الروعة، والأجواء الريفية الرايقة. مخبى بهل بيت غرف عمرها ٢٠٠ سنة، بتجمع الديكور القديم والقعدة المودرن والجو البيتوتي الدافي مع بعض. بتلاقوا كمان جنينة فيها شجر وخضار بتقعدوا فيها ساعات وساعات.

هالبيت العتيق في أوض صخرية واسعة ومقنطرة، شبابيك عالية وبلكونات مع إطلالة جبلية روعة. ألوانها ترابية حلوة ورايقة بتحسوا فيها براحة البال والسعادة، مع تفاصيل فنية.

أما موديل أوض القعدة غير شكل! بتلاقوا كنبايات بنقشات روعة وقعدات عتيقة ولوحات فنية.

هل بيت بضم ١١ أوضة من الخيال، بتناسب العشاق والعيل الكبيرة وجمعات الأصحاب! أوض النوم مثالية لنومة هنية وليلة من العمر. ولما تفيقوا الصبحيات، بتذوقوا أطيب ترويقة لبنانية وبيتوتية محضرة فريش من الجنينة.

وكمان فيكن تنبسطوا بغدا أو عشا محضّر: سلطات فريش، وأطباق الباستا، واللحمة الطرية، والجبنة، وسندويشات شهية! وفوق هيك، فيكن تدوقوا أنعش وألذ كاس نبيد من عندن. كمان هالمكان قريب كتير على محمية الشوف والمناطق الأثرية إذا عبالكن تستكشفوا المنطقة وشو مخبيتلكن.

بحال حبيتوا، فيكن تتصلوا على الرقم: ٧٠٠٨٤٣٥٧

شوفوا كمان، بحاجة لعطلة؟ ٢٤ بيت ضيافة جاهز يستقبلكن هل شتوية