بتعرفوا ليش إسم منطقة “سن الفيل” هيك؟

ما بتخلى منطقة “سن الفيل” من عجقات بيروت وأجوائها، بس شي مرة خطر ببالكن ليه تسمّت المنطقة بهل الاسم الغريب؟ معقول عنجد كان فيه فيل بالمنطقة؟ طب شو دخل السن بالموضوع كله؟ شوفوا معنا كم إحتمالية لكيف طلعوا فيها لهل التسمية!

أول إحتمال

بتقول الخبرية انه المنطقة شكلها متل سن الفيل على الخريطة، ما أدى لهيك تسمية. مش معروف بالزبط مين السلطات اللي طلعت بهل الاسم، يعني ممكن العثمانيين أو الفرنسيين أو اللبنانيي بحد ذاتن، بس هالإحتمال شوي بعيد لأنه فيه كتير مناطق مش بالضرورة تسمت حسب شكلها الجغرافي. بس انتو شو رأيكن؟

تاني إحتمال

فيه كتار ما اقتنعوا بأول احتمال، فرجّعوا تسمية المنطقة بقصة القديس تيوفيل. وقتها أنطاكية كان عندها أثر ديني قوي بالمنطقة، والقديس تيوفيل عاش سنين بسن الفيل وترك أثر كبير من وقت الصليبيين لدرجة تسمّت المنطقة على اسمه “تيوفيل”. وبعد مرور سنين من التغيرات اللغوية تحولت كلمة “تيوفيل” ل “سن – الفيل”. الشغلة اللي ما بتفوت بالمخ بهل الاحتمالية انه ما في لا دير ولا كنيسة للقديس تيوفيل بالمنطقة كلها بس كل شي معقول. غريبة شوي، صح؟

تالت إحتمال

ممكن اسم المنطقة بيرجع لكلمة “Shen-de-Fila” بالسرياني، وبتعني اللون الأبيض العاج، وبترجع التسمية هيك لتميزالمنطقة بالتراب الأبيض الشبه عاجي اللون. ومن بين كل الإحتمالات اللي سمعنا فيها، هيدا أزبط شي!

وانتو شو رأيكن؟ شو ممكن سبب تسمية سن الفيل؟ وبتعرفوا مناطق كمان الها أسماء غريبة؟

شوفوا كمان، قصة الزلزال والتسونامي لي قلبوا بيروت فوقاني تحتاني.