لقينا ١٠ مطاعم إيطالية لقعدة رومانسية مع الحبيب

لبنان كيف ما بتمشوا وكيف ما بتبرموا بيطلع قبالكن مطعم إيطالي، وبتحسوا عبالكن تروحوا علي مع الحبيب أو الشخص الأغلى على قلبكن لتدوقوا أطيب الأطباق وتعيشوا تجربة رومانسية حقيقية، لهيك اخترنالكن مجموعة من المطاعم الإيطالية المناسبة لقعدة حب وغرام من حول لبنان.

١. La Casa Di Pasta، كليمانصو

أول ما تفوتوا على La Casa Di Pasta رح تحسوا حالكن إنتقلتوا على إيطاليا. من الديكور للقعدة للأكل، التجربة هون ما لازم تروحوها عحالكن. غير هيك، القعدة رومانسية ودافية بتروق الأعصاب.

الرقم: 453 881 81

٢. باريطاليا، جبيل

باريطاليا جوهرة مخباية بالسوق العتيق بيتميز بتنوع غني بالأطباق، هل مطعم قريب من المينا، ديكوراتو كلاسيكية مريحة، الخدمة سريعة ومميزة، وبقدم كل أنواع الأصناف الإيطالية مع مكونات شهية وإضافات لذيذة متل النعنع وأعشاب البحر المتوسط وغيرها من النكهات المنعشة. النفس على الأكل بهل محل مختلف واللحظات بتقطع من دون ما تحسوا مع الشخص الأغلى على قلبكن.

الرقم: 505 943 09

٣. ذا وود فاكتوري The Wood Factory Pizzeria، بعبدات

هيدا الكوخ المكنكن بيعمل أكل طلياني بأجواء رومانسية غير عن الكل. المينو كتير بسيط، المحل بس بقدم السلطات والبيتزا بس بيتزا على الأصول، مخبوزة على فرن الحطب – الطعمة رح تاخدلكن عقلكن. هل محل دافي وأكلو طيب-ما تنسوا تجيبوا وردة حمرا لتعيشوا التجربة الإيطالية الرومانسية على الأصول.

الرقم: 628 196 71

٤. مارينيلا، مار مخايل

هيدا المحل من أجمل وأطيب المطاعم الإيطالية ببيروت. قعدتو كتير رواق ومرتبة، الديكور موديرن وساحر وأكلو بشهي.

الرقم: 342 442 01

٥. مارغريتا بيتزيريا Margherita Pizzeria، جونية

هيدا المطعم موقعه كتير مميز. موجود على البحر بشوارع جونية، وعندو تراس غير شكل وقعدة كتير حلوة. أما أكلو فعنجد بشهي. بقدم كل أصناف منطقة نابولي على أطباق بيضة مزينة بالصلصات الطليانية وكمان بيعمل حلو على الطريقة الطليانية.

الرقم: 798 711 81

٦. أفانتي، وسط بيروت

مطعم إيطالي كلاسيكي بقدم الأطباق الإيطالية المشهورة المعمولة على الإيد بكل بساطة وفن بالإضافة لتحضير البيتزا على الحطب متل ما بيعملوها بالضبط بروما. القعدة بهل محل فخمة، اللون الأخضر الفاتح بيطغي على الديكور مع صور لمارلين مونرو وأشهر نجوم العالم القديم. هل محل مناسب لقعدة رومانسية لأن رح ياخدكن رحلة ممتعة بالزمن على شوارع وسط روما لي بتشوفوها بالأفلام الرومانسية لتحسوا بعظمة إيطاليا وسحر مأكولاتها.

العنوان: وسط بيروت، حد ميتروبول Métropole

الرقم: 992 990 01

٧. ذا بينينسولا The Peninsula، ضبيه

عندو قعدة رومانسية دافية وقريبة للقلب. هل مطعم الرائع هو حلم إيطالي، بحضروا كل لقمة بإتقان ومن الوصفات الإيطالية الأصيلة وأفضل المكونات. فيكن تستمتعوا بالأجواء الرومانسية مع الباستا الشهية وتقضوا ليلة إيطالية حقيقية.

الرقم: 240 540 04

٨. دا صوفيا، بدارو

جوهرة مخفية بمنطقة بدارو ببيروت بيتمتع بجو رومانسي وبيتزا وباستا رح تجذبكن دغري. بتتميز القائمة الإيطالية بأطباقها التقليدية متل باستا بالمأكولات البحرية، معكرونة كاربونارا، البيتزا، الريزوتو، و كتير غيرهن! ساحر وخفيف الإضاءة بيجذب كل العشاق حول قعدة رومانسية وشوية حكي حب وغزل مع كاسة نبيد.

العنوان: أويتل The Smallville، بدارو، بيروت

الرقم: 552 995 70

٩. بياتزا Piazza1140، حمانا

هل محل كنز مخفي بضيعة حمانا، بتوصلوا على ساحة الميدان بتلاقوا هل محل المهضوم عندو أكل إيطالي وقعدة كتير مهضومة. بتفوتوا مع الحبيب من البرد على محل كتير دافي ومكنكن بالضيعة وبتتذوقوا كل شي طيب عندن خاصةً البيتزا والباستا المعمولين بنفس طيب.

الرقم: 178 138 79

١٠. غافي، مينة الحصن

هل مطعم من أشهر المطاعم الإيطالية ببيروت، وهوي من أكتر المحلات الرومانسية لي رح تخليكن تعيشوا تجربة غرام حقيقية من خلال الديكور. بغض النظر عن قائمة الطعام الراقية، بيقدم مطعم Gavi تجربة إيطالية أصيلة وأنيقة. تأكدوا إنو تتركوا مساحة للحلو لأن الديسير عندهن كتير طيب.

الرقم: 353 999 01

شوفوا كمان، ٣ مطاعم بدوما مع قعدة بتطير العقل.