دليلكن لأطيب شاورما بالضيعة: ٤ مطاعم لازم تجربوها

من بعد ما خبرناكن عن أطيب منقوشة، هلق اليوم منخبركن عن أطيب ساندويشات الشاورما بالضيعة.

مين ما بحب الشاورما الدجاج مع زيادة توم أو ساندويش الشاورما لحمة مع طرطور وتتبيلة بتشهي؟ كيف إذا كانت معمولة من حواضر الضيعة على الحطب مع قعدة مكنكنة ودافية؟ لهيك رح نخبركن عن مجموعة محلات بيعملوا أطيب شاورما على الأصول بضيع لبنان نحنا وعم نعرفكن عن مميزات كل محل.

١. شاورما الصفا، عاليه

مشوارنا مبلش بضيعة عاليه وتحديداً عند شاورما الصفا يلي بيعمل أطيب ساندويشات شاورما بخبز المرقوق وبشغف. لقمة هل محل لقمة بيت، الخدمة سريعة والكمية كريمة، ما فيكن ما تقولوا شبعتوا بس تخلصوا.

الرقم: 951 557 05

٢. أورفالي غريل، إهدن

الشاورما عند أورفلي بتاخد العقل بطعمتها يلي بتشهي والأطيب من هيك أكيد لما تاكلوها مع زيادة توم وتجربوا التتبيلة يلي بتفتح النفس. القصة ما وقفت على الأكل الطيب وبس، هل محل بيتمتع بقعدة حجر مكنكنة بساحة الضيعة وكمان بتلاقوا عندن أطيب بطاطا مشوية مع جو بروق الأعصاب. الأجواء عائلية وبيستقبلوكن بالترحيب وفيكن كمان تطلبوا شاورما وتروحوا تتمشوا بساحة الميدان وتشوفوا جمال إهدن لي بوقف القلب.

الرقم: 779 666 06

٣. ساندويتش، بكفيا

وهلق منكفي على ضيعة بكفيا يلي بتتميز بمناخها وطبيعتها الجبلية، هل ضيعة كمان بتلاقوا فيها محل زغتور ومهضوم بقلب الضيعة بيعمل أطيب ساندويشات شاورما وصدقوا ولاد الضيعة بحبوا يسهروا كل يوم عندو وياكلوا شاورما مليانة بالكرم، والأطيب من هيك كيف بيعملوا تتبيلة خاصة وبلتوا الشاورما بالخبزة وبحمصوها. غير هيك القعدة عندو مهضومة وخرج أصحاب وحتى عندو أصناف متل البرغر والهوت دوغ والبروستد. الأكل روعة، كمان الحصص كريمة.

الرقم: 781 981 04

٤. حطبة ونار، القبيات

محل مخبى بقلب كوخ حجر بضيعة القبيات وواصل صيتو على بيروت قد ما بيعمل أكل طيب. بحضر الشاورما بخبز التنور المحمص على الحطب بخلطات مميزة وبهارات سرية، صراحة ما شفنا أكبر منها قد ما مليانة وطيبة. لي بميز هل محل إنو بحضر الشاورما بالعرض مش بالطول وكل المكونات من حواضر الضيعة وبيعمل كمان مختلف أنواع المقبلات اللبنانية المميزة وكافة أنواع العصير الطبيعي الفريش، فيكن تستمتعوا بالقعدة جوا بالدفى أو تتمتعوا بهوايات القبيات الحلوين.

الرقم: 798 758 03