باستا، بيتزا، واشهى الأطباق عند هيدا المطعم ببرمانا

عبالكن تجربة أكل مميزة، جو ساحر بياخدكن على عالم تاني تنسوا فيه الوقت وتنبسطوا بلقمة طيبة؟ ميلوا صوب برمانا، امرقوا بالشوارع العتيقة الحلوة ووصلوا على مطعم ما صرله كتير فاتح اسمه Mediterraneo، بقدملكن هيدا المطعم قعدة رومانسية ساحرة وأكل عالمي من مدن البحر الأبيض المتوسط بتشهي. كفوا معنا لتعرفوا اكتر.

المنيو عند Mediterraneo متنوعة وغنية بأطباق من مختلف بلدان، من الأكل اليوناني والطلياني للأسباني وأكيد رح تلاقوا اللبناني التراثي.

بتلاقوا عنده أطباق ممتازة متل طبق الباييلا Paella الاسباني من رز مطبوخ مع زعفران والمأكولت البحرية أو الطبق اليوناني الشهير من سياخ من صدور الدجاج المبهرة والمقدمة مع البطاطا المقلية المقرمشة والصوص، وغيرها كتير خبريات من أطباق اللحمة والسلمون الطيب.

بيتميز كمان المطعم بمختلف السلطات وخاصة السلطة اليونانية المعروفة بجبنة الفيتا، وأكيد بتلاقوا عنده تبولة أصيلة. أما البيتزا عنده قصة، من بيتزا المارجريتا لبيتزا الباسترما وغيرها، رح تجربوا أكلات كتير طيبة ! وأكيد ما مننسى أطباق الباستا اللي بتشق القلب والمازة على أنواعها.

المطعم معمول على الموديل الأوروبي، بتلاقوا قطع من تراث إيطاليا واليونان مخباية فيه. من الألوان البيضا والزرقا المفرفحة والرايقة، والشبابيك العتيقة، وزوايا من الورد والفخار، والأضواء الساحرة، رح تحسوا حالكن عم تتعشوا بمطعم رومانسي باليونان! وفوق هيك بيطل المطعم على شوارع برمانا القديمة وحيوية المنطقة كلها، يعني مكان غير شكل.

بحال حبيتوا المحل، فيكن تتصلوا بالمطعم على الرقم: ٠٣٢٠٠٢٩٥

شوفوا كمان، ياسمين: جنينة وموسيقى وقناطر بهل المطعم الساحر