٨ مطاعم روعة للولاد بلبنان، مع نشاطات وألعاب

الولاد ما بحبوا قعدة البيت، كرمال هيك ما لازم توقفوا تاخدوهون مشاوير حلوة رغم كل شي. كل العيلة والأصحاب تعوا نكتشف سوا وين فيكن تروحوا مع الولاد وتخلوا ولادكن يقضوا وقت ما بينتسى، يلعبوا ويتسلوا ويحبونكن كتير.

١. المرجوحة، الحدت-بعبدا

المرجوحة مطعم لبناني بقدم كل أنواع المأكولات الشرقية وصحون المازة والعديد من الأكلات العالمية مع قعدة مهضومة بيطغي عليها اللون الأزرق والأبيض. رح تلاقوا مساحة ليلعبوا فيها ولادكن، وإذا كنتوا عم تنبشوا على محل ليعملوا في ولادكن عيد ميلادن فهيدا المحل الميثالي لأن في صالة خاصة لأعياد الميلاد ملونة وكتير مهضومة.

الرقم: 749 456 05

٢. جنينة رشانا، رشانا-البترون

جنينة رشانا مطعم مهضوم بتلاقوا على طريق القديسة رفقا، بحضر أكل لبناني عالأصول من البابوج للطربوش، مازة لبنانية ومشاوي ولا أطيب. بتطلعوا على التراس وبتشوفوا القعدة الخشب المهضومة مع المنظر الحلو. الولاد رح يسرحوا ويمرحوا بهل محل لأن في فسحة كبيرة يلعبوا فيها وألعاب مهضومة على ذوقن وفيكن كمان تعملوا أعياد ميلاد الولاد وتجمعولن أصحابن.

الرقم: 390 643 03

٣. بستان، بر الياس-البقاع

موقع هل محل كتير حلو بأجمل نقطة بالبقاع بطل على أحلى منظر. هوي عبارة عن محل للمغامرات والألعاب والركوب بالشخطورة ومطعم كمان. الولاد والكبار رح يحبوا هل محل، فيكن تجتمعوا كعيلة كبيرة مع بعض بهل محل وتتغدوا بأحضان الطبيعة وتتركوا الولاد يلعبوا ويتسلوا والكبار يسولفوا ويتحدثوا. بس كمان ما بيمنع تعملوا عيد ميلاد إبنكن أو بنتكن بمحل مميز وفيكن تعزمولن كل أصحابكن وفي ألعاب للكل.

الرقم: 629 281 03

٤. قرنعون فيلادج، البترون

إذا عبالكن تخلوا ولادكن يكتشفوا شي جديد وتخلوهن يتسلوا ويطبخوا ويعملوا كتير نشاطات ويعملوا تحديات، ما إلكن غير تروحوا على هالمحل يلي هوي عبارة عن بيت حجر مع قعدة جبلية مهضومة، ديكور ريفي، أكل طيب ونشاطات مليانة فرح وبسط وتراث. وكل جمعة بيعملوا بروغرام شكل وكتير مناسب للعيلة والولاد لأن في فريق متخصص رح يرافق ولادكن كل الوقت.

الرقم: 111 642 06

٥. مطعم بحيرة بنشعي، زغرتا

المشوار على بنشعي من بيروت حرزان خاصةً مع الولاد لأن رح يشوفوا البحيرة وحديقة الحيوانات ويطلعوا بالشخطورة ويتسلوا كتير، هيك بتاخدوهن مشوار ببحيرة بنشعي وبتعرفوهن على المنطقة وغير هيك الأكل طيب كتير رح يكيفوا الولاد.

الرقم: 500 550 06

٦. ذا لينك The Link

بقدم كل أنواع الأكل العالمي واللبناني والفاست فود، بس لي بميزو عن غير مطاعم هوي إنو رح يخلي ولادكن يعيشوا تجربة فريدة من نوعها من خلال تحدي لعبة البولينغ والألعاب الإلكترونية المختلفة. مناسب لكل الأعمار، الولاد الكبار والزغار رح يتسلوا لأن كل واحد رح يلاقي لعبة بتناسبوا وكمان رح يتحدوا بعضن. وفيكن كمان، تحجزوا للولاد وتوصلوهن وطمنوا بالكن لأن رح يقضوا وقت عم يلعبوا ويتسلوا.

الفرع الأول: أنطلياس

الرقم: 407 403 04

الفرع التاني: المكلس

الرقم: 416 490 01

الفرع التالت: صيدا

الرقم: 964 990 07

٧. ليتل ريد Little Reed، قصيبة

مطعم محاط بالطبيعة والحيوانات وبعج بالتقاليد الضيعيجية. يعني بتجوا مع الولاد بتستمتعوا بالأكل البيتوتي اللذيذ وبتخلوا ولادكن يطعموا الحيوانات ويختبروا حياة القرية. يعني صدقوا الولاد زهقوا من نفس المشاوير وبيجي عبالن يعيشوا شي جديد ومش مجربينو من قبل.

الرقم: 300 007 76

٨. مطعم بيوماس، جربتا

على طريق البترون، مخبى هل مطعم المحاوط بالشجر والخضار داير من داير، بقدم أكل بيتوتي من جميعو وبيتمتع بفسحة كبيرة للكبار والزغار. فيكن تاكلوا على الغازون، أو تناموا على التكايات أو تتمشوا بهل محل وتشوفوا الزريعة والحيوانات. الولاد فيهن كمان يلعبوا بالمحل المخصص للألعاب ويقضوا نهار تسلاية ونط وفز.

الرقم: 532 532 03

شوفوا كمان، ٥ مطاعم فتحت جديد بلبنان لازم تجربوها.