لقينا ٤ مطاعم بحراجل مع قعدة بتطير العقل

أول ما توصلوا على حراجل وتستمتعوا بجمال الجبال الكسروانية مع نسمات الهوا العليل، رح تعرفوا إنكن وصلتوا على قطعة من الجنة. حراجل بتعني بالسرياني حرج إيل يعني حرج الله وشو في أحلى من إنكن تقعدوا بحضن الله وسط الأحراح والطبيعة الخضرا. من بعد ما خبرناكن عن أجمل المطاعم الموجودة بالقبيات، اليوم رح نروح على حراجل لنخبركن شوي عن هل جوهرة المخفية بأعالي كسروان لنستكشف سوا المطاعم الموجودة بأحضان هل ضيعة ونتعرف على مميزات كل محل.

١. جلسة ليالينا

بيت خشب مخبا بالضيعة محاوط بالخضار وبيتمتع بإطلالة بانورامية بتاخد العقل. بقدم أكل لبناني كتير طيب. أصحاب المطعم مهتمين بأدق التفاصيل لي ما بتخطر عبال حدا وشاغلين عالديكور بكل حرفية. القعدة مريحة كأنو بالبيت وحد النار، الرواق والموسيقى الرايقة والدفا هيدا غير الأكل الطيب والخدمة السريعة لي ولا أروع والكرم أهم شي. شو بدكن أحلى من مطعم بيستعمل مكونات طازجة، وهون فيكن تستمتعوا بكل لحظة مع الناس لي بتحبوهن.

الرقم: 887 886 78

٢. جنة الشعرا

اكتشفوا هالجنة القاعدة على المي الجارية. المطعم تراثي بكل معنى الكلمة، فيو كل شي حلو بتلاقوا بالجبل: الأكل الطيب، البحيرة والمي الجارية، خيمة قش، الأكل بالفخارة، كركة العرق وصاج، الفواكة من الأرض وأكيد مناظر طبيعية رائعة ونفس طيب على الأكل. رح تاكلوا المازة اللبنانية اللذيذة بهيدا المكان يلي بينبض بجو الضيعة والعيلة. عنجد ما لقينا الكلمات لي بتوصف قدي هل قعدة بتريح النفسية خاصةً بعد ما تخلصوا أكل وتشربوا شفة قهوة إنتو وعم تتفرجوا على المي.

الرقم: 650 119 79

٣. جلسة العرزال

أكيد بتستاهلوا هوايات حراجل الحلوين. وبما إنو وصل الخريف، صار وقت تلذذوا بالمناقيش الطيبة وسط قعدة ساحرة وبين الخضار ومقاعد الخشب. موقعو الرائع على الجبل، الأكل بسيط، عبارة عن جبنة و لبنة وزعتر ومناقيش وصحن بيض ولقمة حمص وهوي مشهور كمان بالبطاطا المشوية وعندن مشطاح صخن ولا أطيب من هيك مع فنجان شاي عم يغلي غلي. رح تاكلوا أكل لبناني جبلي بهيدا المكان يلي بينبض بالجو الحلو والعائلي متل جو الضيعة.

الرقم: 883 285 03

٤. عين المرج

المطبخ اللبناني الأصيل ببيت حجر، حتحسوا حالكن قاعدين ببيت التيتا والجدو قد ما الأجواء عائلية وحلوة. الجو عطول شرقي وفي فنان ليولع الجو ويخليكن تستمتعوا بالقعدات الجبلية العتيقة. أكل شغل بيت، موسيقى من وحي جو المحل وأصناف مازة ولا أطيب كفيلين إنن يكونوا العلاج الفعال لكل الضغط النفسي يلي عم تتحملوا ببيروت، ما في متل هوا حراجل المنعش حتى يرجعلكن نشاطكن… استمتعوا بقعدة حلوة عند جلسة العين مع موسيقى وأكل لذيذ وما رح تكمل جلستكن من دون ركوة قهوة على الأصول.

الرقم: 199 070 70