سفرة لبنانية مليانة وجو تراثي حلو: شوفوا معنا مطعم المختار بجنسنايا صيدا

اليوم خاطر عبالنا أكل لبناني طيب ومعمول عالأصول، وكرمال ما بدنا نروح على مطرح كيف ما كان، اخترنا ناخدكن معنا على مطعم لبناني مميز بمنطقة جنسنايا، صيدا. مشوار اليوم حيكون على مطعم المختار، هيدا المطعم اللبناني و التراثي يلي صرلوا من ١٩٩٥ بقدملكن أطيب وأكرم سفرة لبنانية بتاخد العقل. كفوا معنا لتعرفوا تفاصيل أكتر.

بتلاقوا عند المختار ديكور داخلي كلاسيكي من الخشب القديم، قعدة تراثية على الآخر بتذكركن بأيام زمان، يعني أنسب جو للقمة لبنانية طيبة. أما القعدة الخارجية كتير واسعة بتلاقوا فيها جنينة خضرا و ورود ، و جلسات من صخر و غيرها تحت الخيمة، و تحف أثرية وين ما تبرموا و بكل زاوية. و حتى في ملعب خاص للأولاد بحال جايين مع العيلة الكريمة. والأحلى من هيك، بتلاقوا من فترة لفترة حفلات و سهرات كتير حلوة لتغيروا جو.

معروفة كيف السفرة عند المختار: مليانة، وعاللبناني، و مشكلة بمختلف الأصناف. المختار بيعمل الأطباق التراثية بطريقة و تقديم فني غير شكل ، هيدا الشي يلي بخلي الطعمة عنده مميزة عن غيرها من المطاعم اللبنانية. غير أنه التقديم و الطريقة مميزة، كمان الكميات كريمة و الصحن مغنج عالآخر، يعني ما حتحسوا ناقصكن الشي! بس عليكن تشمروا عن إيديكن وتاكلوا.

بقدم الأكل اللبناني يلي كلنا بنحبه، و المازة عنده فنية بس كمان على الأصول، من ورق العنب و الحمص باللحمة والنقانق بالفخارة ، ل الكبة مع كرز و الفتايل مع دبس الرمان.

أما اللحمة النية معمولة بطعمة أصيلة رائعة، أي حدا بحب هيك خبريات رح يعجبو كل طبق. وهيدا كله و نحنا بعد ما حكينا عن المشاوي المميزة و المشكلة أو عرايس الكفتة يلي بتاخد العقل.

قعدة مثالية لجو عيلة أو جمعات كبيرة، شو ناطرين؟ بحال حبيتوا فيكن تتصلوا بالمطعم على ٠٣٤٣٤٨٥٥

شوفوا كمان: يلا على المشاوي: أطيب سفرة مشاوي ب ٧ مطاعم بالجنوب