جواهر مخفية لازم تكتشفوها بضيعة حدشيت الساحرة

ضيعة حدشيت من أجمل الضيع الموجودة بلبنان! شو بميزها؟ رح نعمل جولة بهل ضيعة ونكتشف سوا شو لي بخليها مميزة. بتوصلوا على الضيعة بتشوفوا البيوت العتيقة يلي تعتبر كنز من كنوز لبنان. بتكفوا مشواركن وبتنزلوا على ضيعة من تحت بتحسوا حالكن بالجنة، كل ما تنزلوا. يلي بدو يعمل كزدورة ويكتشف طرقات الضيعة وطبيعتها الحلوة في كتير طرقات فينا نمشي فيها بحدشيت، بس كل الطرقات نزول بتوصلكن على الشير مطرح ما بتلاقوا الوادي تحتكن.

يلي بميّز ضيعة حدشيت عن باقي ضيع بشري إنها الأقرب على الوادي بتحسوها واقفة على الوادي المقدس وقريبة من السما.

تعو نعرفكن على أجمل الإشيا يلي فينا نعملها بحدشيت!

١. دير مار الياس

جوهرة مخفية بحدشيت. أول مرة زرنا هل مزار حسينا بدفا وحب ما بينوصفو. من بعد أول مرة، ما فيكن ما ترجعوا تجو. الشي لي بميز هل مكان إنو بطل على جبال إهدن المجيدة من ميلة وعلى وادي قنوبين المبارك من تاني ميلة: جنات على مد عينكن والنظر.

٢. الشير

بس توصلوا على الشير تأملوا السما قبالكن وخلو نظركن يسرح لبعيد.

٣. مرقوا على طاحونة المي الأثرية

يعتبر هل موقع من أجمل الأماكن الطبيعية والسياحية الموجودة بحدشيت وبيحمل إطلالة رائعة على وادي قنوبين وعلى سطح هل موقع قعدة رايقة بتخليكن تمتعوا نظركن بجمال الضيعة.

٤. مطعم أبو شربل

بقدم أطيب المأكولات اللبنانية مع منظر بطير العقل.

الرقم: 135 596 03

٥. مطعم Golden Nights

مدوا سفرة عند هل مطعم، الأكل بشهي والجو مريح كفاية ليعيشكن جو الضيعة.

الرقم: 444 645 06

٦. ميّة العين

أكيد لازم تشربوا مي مسقعة من العين بتبورد القلب والروح: أطيب مي بالدني.

٧. زيارة الحاكم الروماني

ما فيكن تمرقوا على الضيعة من دون ما تسلموا على الحاكم الروماني. رح تشوفوا إنو مقطوع راسو، شو السبب؟ تعوا نخبركن هل خبرية، من زمان كانوا الحتاتشي بدن يعمروا كنيسة وشافوا في تمثال لحاكم روماني مدفون بالأرض لي عم بعمروا فيها، اعتقدوا إنو كان عايش لفترة بالضيعة وكانت حتى الأرض لي مدفون فيها ضل يابسة وكل ما يعمروا الكنيسة توقع فبالآخر اكتشفوا إنو السبب هوي التمثال، فقرروا يحملوا وينقلوا على الساحة ويقطعولو راسو وديّاتو وهيك تعمرت الكنيسة ورجعت الأرض خضرا ومن هون إجا المتل اللبناني لي بقول “واقف متل الصنم” متل ما الحاكم الروماني واقف بساحة حدشيت متل الصنم ما بينزاح.

٨. كنيسة مار رومانوس

كنيسة مار رومانوس أو مار مانوس متل ما بقولولها ولاد الضيعة كنيسة أثرية حلوة كتير تاكية على كتف الوادي وهل كنيسة حبيبة قلب أهل الضيعة كلن، لدرجة إنو كل بيت تقريباً في عندن ريمون.

٩. برج حدشيت

بوابة أثرية بتتميز بحجارها الملونة والمزخرفة تعتبر من أهم الكنوز المخفية الموجودة بالضيعة وكان يستخدم كحصن منيع لتصدي الإضطهادات.

١٠. وادي حولات

نزلوا على وادي قديشا من حدشيت، أكتر جزء من الوادي لي في أيدرة ومحابس أثرية لمحبي الطبيعة والرواق، وكمان بتلقوا بأطول مبخرة بالعالم وبتشموا ريحة البخور العطرة، بهل مكان بتتعرفوا على تاريخ جدودنا وبعرفوكن على أجمل الأماكن الطبيعية في، وبتاكلوا أطيب المأكولات القروية.

وبس تفلوا من حدشيت رح تتركوا شقفة من قلبكن فيها لترجعوا تاخدوها بس تجو مرة تانية، ومتل ما بقول يوسف بيك كرم “حدشيت الكاملة” وفعلاً كاملة من كل الميلات وأهم شي بالمحبة والتواضع والطيبة وأكيد الجمال.

شووفا كمان، لقينا ٦ مطاعم بالقبيات مع قعدة بتطير العقل.