أبرز المتاحف والمواقع الأثرية لي فيكن تزوروها اليوم ببلاش بلبنان

متل ما بتعرفوا طلع قرار وزير الثقافة بحكومة تصريف الأعمال محمد المرتضى لي بنص على تمديد قرار الدخول المجاني للبنانيي للمواقع الأثرية والمتاحف الوطنية لآخر شهر أيلول، لهيك رح نعرفكن على بعض هل مواقع السياحية ومننصحكن تستفيدوا وتزوروها هل ويك-أند وتشوفوا كيف فيكن تقضوا نهار حلو وتاكلوا لقمة طيبة.

١. المتحف الوطني، بيروت المتحف

أول ما تفوتوا على المتحف الوطني رح تحسوا بالعظمة والفخر والجمال ورح تشوفوا تاريخ وطنكن عبر منحوتات ورسومات وأثار وأبرز وجوهها الحضارة الفينيقية لي انطلقت من لبنان ونشرت الأبجدية للعالم بفضل قدموس الصوري.

الرقم: 703 426 01

وين فيكن تاكلوا ببيروت؟ ميلوا على مطعم إمي وأنا Mum & I

الرقم: 650 425 01

٢. قلعة بعلبك، بعلبك

من أجمل المواقع الأثرية الموجودة بلبنان ومخباية ضريح السيدة خولة وهيي نقطة الإطلاق لمهرجانات لبنان الدولية. زوروا معبد باخوس ومعبد فينوس والأثار الرومانية المتبقية من قلعة بعلبك.

وين فيكن تاكلوا ببعلبك؟ ميلوا على مطعم العجمي

الرقم: 032 322 81

٣. قصر بيت الدين، بيت الدين

بس تطلعوا على الشوف، رح تكتشفوا منطقة الأمرا شو مخباية ومن أجمل المواقع الموجودة بالمنطقة قصر بيت الدين لي كان يحوي الأمرا اللبنانيي المعنيي ورجع صار مقر للولاة العثمانيي والفرنساويي قبل ما يتحول لقصر سياحي بإمتياز. بيتميز هل قصر بكبرو وبغرفو العريقة والهندسة التراثية الفخمة. بتفوتوا على البيت وبتصيروا ضيعوا بين الأوض متل الأفلام.

الرقم: 077 500 05

وين فيكن تاكلوا ببيت الدين؟ ميلوا على مطعم قصر المير أمين

الرقم: 315 501 05

٤. مغارة جعيتا، جعيتا

هل مغارة بتستاهل زيارتكن لأول مرة لأن عنجد رح تكون تجربة بتطبع ذاكرتكن. الحرارة جوا مثالية بتطلعوا بالشخطورة وبتبرموا المغادة وبتشوفوا إبداع الطبيعة.

الرقم: 841 220 09

وين فيكن تاكلوا بجعيتا؟ ميلوا على مطعم لقمة على البلدي

الرقم: 516 916 09

٥. قلعة جبيل الأثرية

من أجمل المواقع بلبنان لي رح تسحركن. اكتشفوا كل زاوية من هل قلعة وعيشوا حلم العصور الوسطى وتفرجوا على البحر وعلى أجمل ما عمر الله من فوق.

الرقم: 001 540 09

وين فيكن تاكلوا بجبيل؟ ميلوا على مطعم فينيقيا

الرقم: 444 540 09

٦. قلعة صور الأثرية

هلق مننزل على صور لنختم جولتنا ومنروح على سيدة البحار لنتعرف على القلعة الرومانية الأثرية وفيكن كمان تبرموا هل منطقة الزاخرة بالحضارات من الفينيقية وصولاً للرومانية وما تنسوا تزوروا البحر والسوق العتيق.

وين فيكن تاكلوا بصور؟ ميلوا على مطعم الفنار

الرقم: 111 741 07

وهيك خبرناكن عن بعض هل مواقع الأثرية بس أكيد فيكن تزوروا باقي الأثارات وتستمتعوا بالطقس الحلو هل ويك-أند.

شوفوا كمان أبرز شخصيات الزمن الجميل بلبنان.