ودعوا الصيفية بهالبيت الضيافة الأزرق بشمال لبنان

مشوارنا اليوم على أنفه، منطقة سياحية بالكورة بالشمال، حاملة بشوارعها التاريخ الفينقي، بتتميز ببحرها الأزرق النقي وألوان الأزرق والأبيض.

هلق رح نمشي بشوارع أنفه لنوصل على بيت ضيافة ساحر نايم على البحر بيتميز بجلسة حجر وغرف مهضومة ومكنكة مع طابع يوناني ولمسة فينيقية، لوين وصلنا؟ على بيت مرسة.

رح نفوت على بيت مرسة… العيشة ببيت مرسة متل الحلم، لأن رح تفيقوا على صوت البحر وتتأملوا الشبابيك الزرق وتسرحوا بنظركن لبعيد.

بيتألف بيت مرسة من 8 أوض نوم، كل أوضة بتحكي قصة، كل أوضة عندها مدخل خاص وAC لتبوردوا بالشوبات وحمام خاص.

بضم هيدا المحل المميز جنينة رايقة بتكون المحل المثالي لتستمتعوا بفنجان قهوة الصبح وتقروا كتابكن المفضل. بهل محل رح تلاقوا الرواق لي عم تنبشوا علي، وأكيد لازم تعملوا كزدورة على البحر وتخلوا صوت المي والموج يفوت على قلبكن ويخليكن تولدوا من جديد.

من جوا، بيتميز بيت مرسة بالديكور التراثي لي بيطغي علي لون الأزرق والأبيض وبنفس الوقت بتلاقوا كل شي بتحتاجوا لتقضوا يومين حلوين.

بأحضان أنفه الساحرة، النومة ولا أحلى! تخايلوا عم تناموا والهوا غامركن، والبحر قبالكن.

هل محل بقدم ترويقة على شكل بوفيه كل يوم الصبح، فيكن تستمتعوا بأحلى قعدة على التراس أو بالجنينة أو حتى بالأوضة إذا عبالكن تكونوا لحالكن.

أما إذا عبالكن تروقوا راسكن، طلعوا على الجنينة وقعدوا على المرجوحة وخلو الهوا يطيركن لبعيد.

بالنسبة للأسعار فهي بتبلش من 60$ وبتوصل ل110$ على الليلة بنص الجمعة و120$ بالويك-أند. غير هيك، هل محل قريب كتير على منتجع تحت الريح يعني فيكن تعملوا سبحة وقت لي بيطلع على بالكن لأن الطقس بعدو منيح أو تاكلوا من مطاعم الضيعة وتزوروا سوق أنفه العتيق وتسرحوا بهل منطقة لأن عنجد عالم تاني. هلق إذا كنتوا بتحبوا السمك وثمار البحر، نصيحة ميلوا عند شي فؤاد أو ووسيم على البحر وطلبوا أطيب سفرة سمك بس عملوا حسابكن إنو الأكل البحري شوي غالي بس أكيد ولا أطيب من هيك بأنفه.

بيت مرسة بيجمع بين غرف النوم المريحة والتراس، الشبابيك الزرق والجنينة، ومنظر البحر لي رح تحسوا عم بعيطلكن كل الوقت.

عبالكن تعيشوا تجربة ما في متلها؟ ما إلكن غير دقوا وتحجزوا على هيدا الرقم: 425 000 70.

بدكن دوقوا لقمة يونانية وترقصوا على الزوربا وتكسروا صحون متل باليونان؟ تعرفوا على ياماس: قطعة من اليونان بقلب لبنان.