تعرفوا معنا على أجمل الأماكن للشوي بالطبيعة بلبنان

بما إنو صارت الروحة على المطاعم بلبنان غالية كتير وخاصةً بعد الأزمة ولأن كل فشخة منعملها صارت مكلفة كتير بهل بلد لذلك في بعض الأماكن بلبنان فينا نزورها ونستمتع فيها مجاناً ونعمل بيكنيك وننسى همومنا ومن أبرزها:

١. جرود العاقورة

ما في أحلى من القعدة بطبيعة جرود العاقورة مطرح ما فيكن تخيموا وتسهروا تحت النجوم ووسط أجواء دافية وتخلوا خيالكن يسرح لبعيد. فيكن تركبوا المنقل وتشووا وتتفرجوا على برك المي الروعة وتتأملوا الجمال والتراث لي حواليكن.

٢. سرجبال

هل ضيعة الحلوة بقلب الشوف مغمورة بالشجر، قاعدة بين هل الجبال وبتطل على أجمل المناظر الطبيعية. الحلو بهل ضيعة إنها قريبة على بيروت وبنفس الوقت ضيعة على الأصول، فيكن تنقوا حيلا زاوية خضرا بالضيعة وتقعدوا وتعملوا بيكنيك وتشووا. روحوا كمان على شلال سرجبال لي هوي من أجمل الشلالات الموجودة بلبنان، فيكن تسبحوا بهل المي النقية، تاخدوا صور أو تقضوا أحلى نهار.

٣. مغراق عبدلي، البترون

استمتعوا برحلة ساحرة على ضيعة مغراق الغرقانة بالمي والبيت الخشب لي مخبى فيها وعملوا أحلى بيكنيك. هيك قعدة بدها مشاوي من دون شك، طلعوا معكن اللحمة والكفتة والطاووق وهني بيعطوكن المتنقل. رح توصلوا وتلاقوا المي محيطة بالبيت رح تحسوا حالكن بفينيز للحظة: تجربة بتاخد العقل! بس أكيد لازم دقوا قبل بوقت وتتأكدوا إذا النهار لي بدكن تطلعوا في، بكون البيت مفتوح للكل.

الرقم: 118 861 71

٤. جرود جزين

جزين تعتبر من أجمل الضيع بلبنان. فيكن تقضوا النهار كلو وما تشبعوا منها. القعدة بالجرد فيها من أكبر عدد التنوع بالنباتات بالحرش. ما في أجمل من إنو تحضروا أكل بهيك مكان والهوا يغمركن من كل الميلات وتشموا ريحة الصنوبر وتاكلوا بأحضان الطبيعة. الهدوء هونيك مع منظر الشلال ومنظر جبال لبنان بخليكن تسرحوا بعالم تاني.

٥. جاج

جاج من أجمل الضيع الموجودة بلبنان، ضيعة قديمة بس بتنبض حياة ومعروفة بغابة الأرز المعمرة والكنايس الأثرية والطبيعة الخلابة والطقس البارد بالصيفية والصقيع والتلج بالشتوية. رح تنبسطوا كتير بالقعدة وتحضير الأكل هونيك لأن ما كتير عالم بروحوا لهونيك بسبب موقعها والصفات. بس إذا فيكن تتمشوا وتوصلوا على الحرش رح تنقوا أحسن زاوية، أكيد حتحبوا هل ضيعة المميزة.

٦. غابة العزر، القموعة

هلق رح نروح على زاوية مخباية ببلدنا، بتشبه غابات سويسرا موجودة بين القبيات والقموعة فيكن تقعدوا فيها وتحضروا أكلكن وتعملوا بيكنيك وهيي من المساحات الخضرا لي فيكن تزوروها لوحدكن أو مع العيلة. كتير كبيرة وفيكن كمان تركبوا حنزوقة بين الشجرات وتخلصوا أكل وتتلذذوا بفنجان قهوة بالطبيعة.

٧. جرود فالوغا

يمكن لو قضينا العمر كلو عم نوصف جمال هل مكان مش رح نعطي حقو. موجود بأحضان الطبيعة الخضرا ومحاط بالشجر والمناظر على مد عينكن والنظر. بتجوا بتحضروا أكلاتكن وبتتفرجوا على مغيب الشمس من محل ساحر، رح تنبهر بجمال فالوغا.

٨. اللقلوق

اللقلوق واحدة من أشهر المطارح الشتوية بلبنان بسبب الحلة البيضا الناصعة يلي بتلبسها وبتزيد على جمالها جمال بس هل شي ما بيغني عن إنو الطبيعة الخضرا لي فيها كتير حلوة. فيكن تتمشوا بالجبال مع مجموعات أو مع رفقاتكن، وتبرموا المنطقة، وتعملوا مشاوي، وتخيموا تحت ضو القمر بس يكون بدكن تهربوا من عجقة المدينة.

أهم شي تنضفوا وراكن وما تتركوا شي على الأرض لأن هل طبيعة ما عنا غيرها ثروة بلبنان.

شوفوا كمان: ١٠ محلات فيكن تعملوا فيها بيكنيك بأحضان الطبيعة بلبنان.