زهرتوني: أطيب معكرونة إيطالية بلبنان

مين ما بيعرف ضيعة القبيات؟ هل ضيعة من أجمل الضيع بلبنان لي ما بيعرفها ما بيعرف إنو فيها مطعم إيطالي من أطيب المطاعم لي بتعمل باستا طليانية على الأصول: زهرتوني.

الشيف طوني قرر يرجع على لبنان ويعمل أطيب معكرونة إيطالية بلبنان.

طوني زهر إنسان بيعشق الحياة والأكل الإيطالي وضيعتو القبيات، كرمال هيك، بعد ما فتح لسنين بالأشرفية، قرر يجيب طعمات إيطاليا على قلب الضيعة وياخدنا جولة على شوارع روما لناكل المعكرونة على الأصول.

هيدا المطعم موقعه كتير مميز. موجود بوادي حلسبان بالقبيات، يعني قاعد بالطبيعة ويتمتع بفيو ساحر وعندو قعدة غير شكل وقعدة كتير حلوة على التراس. أما أكلو فعنجد بشهي.

الشي المميز بهل مطعم إنو بيعمل باستا organic من طحين الفرخة والبيض مع زيت الزيتون والمي، عكس الباستا الجاهزة لي بيعملوها بالمطاعم عادةً لي بتحسوا إنو طعمتها متل طعمة العجين لأن بس بيستعملوا الطحين.

الحلو إنو الشيف طوني بحضر كل شي على إيدو والباستا طازة والخضرا فريش.

نصيحة، لازم تجربوا السباغيتي بالحبق والسباغيتي Pomodoro لي بتجي مع صلصلة البندورة!

القعدة بهل محل بترد الروح وصدقوا هل ضيعة من أجمل ضيع لبنان بطبيعتها الإستثنائية وأكلها الطيب.

بتجوا بتقعدوا بهل محل الموجود بغابات حلسبان، بين الشجر والوديان، مطرح ما رح تحسوا حالكن بحلم وبتاكلوا أطيب لقمة.

عند زهرتوني رح تاكلوا باستا شهية معمولة على الإيد، بشغف وحب وفن مع خلطات سرية وطعمات متنوعة وشهية وكمان بتجربوا أطباق طليانية مختلفة وبيتزا بيتوتية معمولة من أجود المكونات.

هل محل بيفتح من التنين للأحد

الرقم: 844 469 81

شوفوا كمان: لقينا ١٣ مطعم بيعمل أطيب صحن باستا بلبنان